Memleket baqylaýdy kúsheıtti: múgedektikke ótinimder qalaı tekseriledi

ASTANA. KAZINFORM – Bir jyl ishinde táýelsiz sarapshylar múgedektikti belgileý boıynsha syrttaı formatta 113 myńnan astam ótinimdi qarady.

Alaıaqtyq búginde áleýmettik qoldaý men densaýlyq saqtaý júıesine degen qoǵam senimin álsiretetin eń ózekti máselelerdiń birine aınaldy. Bul naqty medıtsınalyq negizsiz jeńildikter alý, qosymsha qarjy tabý maqsatynda emhanalarda naýqastar nemese kórsetilgen qyzmetter sanyn jasandy túrde arttyrý, tipti qansha oǵash estilse de, jalǵan múgedektik faktilerine qatysty bolyp otyr.

Mundaı tájirıbeler memlekettik resýrstardyń maqsatsyz jumsalýyna alyp keledi, shyn máninde kómekke muqtaj azamattardy qoldaýdan shet qaldyrady jáne áleýmettik ınstıtýttarǵa degen senimsizdikti kúsheıtedi. Máseleniń aýqymy sonshalyq, ol tek ekonomıkaǵa ǵana emes, qoǵamnyń moraldyq ahýalyna da áser etip, ádiletsizdik sezimin jáne masyldyq kózqarasty kúsheıtedi.

Medıtsınalyq-áleýmettik saraptamanyń táýelsiz sarapshylary ınstıtýty 2025 jylǵy 1 qańtarda múgedektikti taný protsesin barynsha ashyq, obektıvti ári azamattar úshin qolaıly etý maqsatynda quryldy. Onyń syrttaı, proaktıvti formattaǵy jumysy azamattyń jeke qatysýynsyz tsıfrlyq medıtsınalyq derekterdi paıdalanýǵa múmkindik beredi. Bul bıýrokratııalyq rásimderdi qysqartyp, sýbektıvti faktordyń yqpalyn boldyrmaıdy.

Sarapshylardyń táýelsizdigi sheshimderdiń jeke baılanystarǵa nemese qysymǵa emes, naqty ári senimdi aqparatqa negizdelýine kepildik beredi. Mundaı tetik áleýmettik qoldaý júıesin teris paıdalanýdan qorǵaıdy, jalǵan dıagnozdar men qoldan jasalǵan anyqtamalar arqyly jeńildik alýdyń aldyn alady, osylaısha áleýmettik alaıaqtyq pen masyldyqqa tosqaýyl qoıady.

Nátıjesinde kómek shynymen muqtaj azamattarǵa kórsetilip, memlekettik resýrstar ádil ári nysanaly túrde bólinedi, bul qoǵamnyń áleýmettik saıasatqa degen senimin nyǵaıtady.

Bir jyl ishinde táýelsiz sarapshylar múgedektikti belgileý boıynsha syrttaı formatta 113 myńnan astam ótinimdi qarady. Bul kórsetkish múgedektikti belgileý jónindegi barlyq memlekettik qyzmetterdiń 42,5 paıyzyn quraıdy.

– Táýelsiz sarapshylar ınstıtýtyn engizýdiń negizgi nátıjesi – azamattardyń densaýlyq jaǵdaıyn jáne eńbekke qabilettiligin joǵaltý deńgeıin baǵalaýǵa jumys istep júrgen dárigerlerdiń tartylýy, – dep túsindirdi QR Eńbek jáne halyqty áleýmettik qorǵaý mınıstrliginiń Halyqty áleýmettik qorǵaý salasyndaǵy retteý jáne baqylaý komıteti medıtsınalyq-áleýmettik saraptama basqarmasynyń basshysy Fardana Halıkova.

Onyń aıtýynsha, táýelsiz sarapshylar júıesin engizý medıtsınalyq-áleýmettik saraptama (MÁS) qyzmetiniń shtat sanyn arttyrmaı-aq mamandardyń kadrlyq rezervin qalyptastyrýǵa múmkindik berdi.

– Sarapshylar ózderi turatyn óńirden bólek aımaqtardaǵy isterdi qaraı alady. Bul medıtsınalyq uıymdar men ótinish berýshiler tarapynan yqpal etý múmkindigin joqqa shyǵarady, – dep tolyqtyrdy Fardana Halıkova.

Táýelsiz sarapshylardyń jumysy ýákiletti organ tarapynan saraptamalyq qorytyndylardy taldaý, shaǵymdaný kórsetkishteri, sondaı-aq aı saıynǵy jáne jyldyq tekserý nátıjeleri arqyly baǵalanady. QR Eńbek jáne halyqty áleýmettik qorǵaý mınıstriniń № 408 buıryǵyna sáıkes sarapshylar jumysynyń erejeleri men baǵalaý krıterııleri bekitilgen.

Aktilerdi avtomattandyrylǵan túrde bólý júıesi sarapshylardyń táýelsizdigin qamtamasyz etedi.

– Qujattar sarapshynyń turǵylyqty jeri boıynsha joldanbaıdy, bul uıymdar men ótinish berýshiler tarapynan qysym kórsetý múmkindigin boldyrmaıdy, – dep túsindirdi spıker.

Táýelsiz sarapshylar tizilimine engizý úshin áleýmettik qyzmetter portaly arqyly konkýrstyq irikteý kózdelgen. Oǵan joǵary medıtsınalyq bilimi jáne keminde bes jyl eńbek ótili bar mamandar qatysa alady. Barlyq qujattar memlekettik aqparattyq júıeler arqyly tekseriledi.

Mınıstrlik sarapshylar jumysyna monıtorıng júrgizip, qabyldanǵan sheshimderdiń sapasyn, qaraý merzimderin jáne shaǵymdar nátıjesin taldaıdy. Zańbuzýshylyqtar anyqtalǵan jaǵdaıda sarapshy tizilimnen shyǵarylýy múmkin.

– Táýelsiz sarapshylardyń sheshimderine qatysty shaǵymdar men ótinishter QR Ákimshilik rásimdik-protsestik kodeksine sáıkes, qaıta qaraý múmkindigimen belgilengen tártipte qaralady, – dep qosty Fardana Halıkova.

Buǵan deıin Memleket basshysy Qasym-Jomart Toqaev masyldyqty yntalandyrý tájirıbesinen bas tartý qajet ekenin aıtqan bolatyn.