Memleket aýyldarda kóshpeli dárihanalar ashýy tıis - «Aýyl» partııasy

NUR-SULTAN. QazAqparat - Memleket aýyldarda jyljymaly dárihanalar ashýy tıis. Bul týraly «Aýyl» halyqtyq-demokratııalyq patrıottyq partııasy ortalyq apparatynyń jetekshisi Qýanysh Seıitjanov aıtty, dep habarlaıdy QazAqparat tilshisi.

«Aýyldarda sheshimin tappaı jatqan, aýyl turǵyndaryn mazalap otyrǵan taǵy bir úlken másele - dárihana. Shaǵyn aýyldarda dárihana múldem joq bolsa, úlken aýyldarda bir-ekeýden ǵana bar. Koronavırýs indeti shyrqaý shegine jetken sáttegi qalada oryn alǵan jaıtty ózderińiz de jaqsy bilesizder. Al aýyldardyń jaǵdaıy múldem múshkil boldy desek, artyq aıtqanym emes. Árıne, shaǵyn aýyldardyń árqaısysyna dárihana ashý bıznes úshin tıimsiz shyǵar. Biraq, mundaı jaǵdaıda memleket iske kirisip, shaǵyn aýdandarda áleýmettik dárihanalar ashýy qajet. Mysaly Shyǵys Qazaqstan oblysynyń 1-2 aýdanynda jyljymaly dárihanalar aýyl turǵyndaryna qyzmet kórsetken eken. Nege osy tájirıbeni barlyq aýylda qoldanbasqa?», - deıdi Qýanysh Seıitjanov.

Sonymen qatar ol buǵan deıin tıimdiligin kórsetken kóshpeli medıtsınalyq qyzmet kórsetý júıesin qaıta jandandyrý qajettigin basa aıtty.

«Ony jandandyrmaıynsha kúzde bolady-aý dep otyrǵan koronavırýs indetiniń ekinshi tolqyny kezinde aýyldardyń jaǵdaıy budan da qıyn jaǵdaıǵa tap bolady dep bilemiz»,- deıdi ol.