Memleket aýyl sharýashylyǵynyń keı ónimderin sýbsıdııalaýdan bas tartady

NUR-SULTAN. QazAqparat - Memleket aýyl sharýashylyǵynyń keıbir ónimderin sýbsıdııalaýdan bas tartady. Bul týraly búgin Úkimet otyrysynda QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«2017 jyldan bastap biz ósimdik sharýashylyǵyndaǵy taýarlyq-spetsıfıkalyq sýbsıdııalardy azaıta bastadyq. Máselen, aldymen dándi daqyldardy, sosyn maıly jáne kókónis-baqsha daqyldaryn sýbsıdııalaýdan bas tarttyq. Qazirgi ýaqytta iri qara mal etine, jumyrtqaǵa, qymyz ben shubatqa, kúrishke, maqtaǵa arnalǵan sýbsıdııany alyp tastaýdy josparlap otyrmyz. Óıtkeni bul taýarlar boıynsha elimizdiń ózin-ózi qamtamasyz etý deńgeıi turaqty», - dedi mınıstr.

Bul rette ol bosaǵan qarajat salada qalatynyn aıtady. ıAǵnı, ol azaımaıdy jáne eshqaıda ketpeıdi. Asyl tuqymdy urǵashy mal basyn satyp alý, sondaı-aq ımportqa táýeldi pozıtsııalar - sút, qus eti, qant qyzylshasy sııaqty basym baǵyttardy ǵana sýbsıdııalaýǵa qaıta bólinedi.

«Ónim birligine arnalǵan sýbsıdııa ónim óndirisin arttyrýdy ekonomıkalyq turǵydan tıimdi yntalandyrady. Bul rette ónerkásiptik jáne tehnologııalyq óndiristi qoldaýǵa basymdyq berilýi tıis. Alaıda, memlekettik qoldaýdyń bul túri ishki naryqty molyqtyrǵanǵa deıin ýaqytsha sıpatta bolýy qajet», - dedi S.Omarov.