Memleket aýyl sharýashylyǵy ónimin óndirýshiler nesıeleriniń paıyzyn tómendetti
«Bıyl memleket aýyl sharýashylyǵy taýaryn óndirýshilerdiń nesıelerin arzandatýda. Memlekettik sýbsıdııalar aýyl sharýashylyǵy tehnıkasy men jabdyqtaryn alýǵa baǵyttalǵan lızıng pen agrarlyq saladaǵy óndiristi damytý úshin alynǵan aqshalaı nesıelerge tólenedi. Memlekettik qoldaýdyń bul túri «Agrobıznes-2020» baǵdarlamasynyń aıasynda bekitilgen», delingen QR AShM usynǵan málimette.
Birinshi kezekte, fermerlerdiń etti jáne sútti mal, qoı sharýashylyǵy salalaryndaǵy, baqsha sharýashylyǵy men aýyl sharýashylyǵy ónimderin qaıta óńdeý salalaryndaǵy bıznesin damytýǵa, sonymen qatar, atalǵan salalar úshin lızıngke alynǵan tehnıka men jabdyqtar sýbsıdııalaýǵa jatady.
Jalpy agrarlyq óndiristiń barlyq baǵyttary boıynsha alynǵan nesıeler arzandatylady.
«Baǵdarlama talaptary boıynsha qaryz alýshylardyń teńgemen alynǵan syıaqy mólsherlemesi jyldyq 14 paıyzdan aspaıtyn, sheteldik valıýtamen alynǵan syıaqy mólsherlemesi jyldyq 10 paıyzdan aspaıtyn nesıelik jáne lızıngtik mindettemeleri sýbsıdııalanady», dep atap ótilgen habarlamada.
Aınalymdaǵy qarajatty tolyqtyrýǵa, negizgi jabdyqtardy satyp alýǵa jáne qurylysqa, sondaı-aq tehnologııalyq jabdyqty, aýyl sharýashylyǵy tehnıkasy lızıngine arnalǵan teńgemen alynǵan nesıelik jáne lızıngtik mindettemeler boıynsha syıaqy mólsherlemesi jyldyq 7 paıyzǵa, sheteldik valıýtadaǵy nesıelik jáne lızıngtik mindettemeler boıynsha 5 paıyzǵa tómendetildi.
Munymen qosa, mal sharýashylyǵy men jemshóp óndirý salasyndaǵy aýyl sharýashylyǵy tehnıkasy men jabdyqtaryn satyp alýǵa negizdelgen teńgemen alynǵan nesıeler boıynsha syıaqy mólsherlemesi jyldyq 10 paıyzǵa, sheteldik valıýtadaǵy nesıeler jyldyq mólsheri 7 paıyzǵa tómendetildi.