Memleket arnaıy derekter bankinen qurylys jobalaryn erkin paıdalana alady

ASTANA. KAZINFORM — Qazaqstanda qurylys jobalarynyń memlekettik bankinde ornalastyrylatyn jobalardyń avtorlyq quqyq máselesi retteldi. Ónerkásip jáne qurylys mınıstrligi Qarjy mınıstrligimen birlesip tıisti sharalar qabyldady.

Bul másele qurylys salasynda baǵa belgileý júıesine júrgizilgen memlekettik aýdıt kezinde belgili boldy.

Joǵary aýdıtorlyq palata memlekettik bankte 6,7 myńnan astam joba bar ekenin, alaıda keıbireýlerine avtorlyq (múliktik) quqyq bolmaǵandyqtan, olardy paıdalanýda qıyndyq týyndaıtynyn anyqtady.

— Al jobalar banki negizinen memleket bir-birine uqsas obektilerdi salý kezinde únemi jańa qujattamaǵa tapsyrys bermeı, jumsalatyn qarajatty únemdeýi úshin quryldy. Osyǵan baılanysty Ónerkásip mınıstrligine Qarjy mınıstrligimen birlesip zańnamaǵa qajetti ózgerister engizý jáne avtorlyq quqyq máselesin retteý tapsyryldy, — dep habarlady palatadan.

Nátıjesinde jańartylǵan «Memlekettik satyp alý týraly» Zań aıasynda (2025 jylǵy 1 qańtardan bastap kúshine endi) jańa qaǵıdalar bekitildi. Endi jobalaý nemese jobalaý-smetalyq qujattamany jasaý jónindegi jumystardy satyp alý týraly shartqa sáıkes oryndaýshy jobany odan ári paıdalaný quqyǵyn tapsyrys berýshiniń paıdasyna beredi. Bul qujattamany qabyldaý-tapsyrý aktisine qol qoıý arqyly resimdeledi. Bul norma bıýdjet qarajaty jáne kvazımemlekettik sektor sýbektileri esebinen salynatyn qurylys jobalaryna qoldanylady. Memlekettik aýdıt qorytyndylary boıynsha basqa da tapsyrmalardyń oryndalýy Joǵary aýdıtorlyq palatanyń baqylaýynda bolady.

Eske sala keteıik, buǵan deıin Joǵary aýdıtorlyq palata sýbsıdııalar tizbesin qaıta qaraý qajet ekenin habarlaǵan edi.