Memleket alǵashqy baspanasyn alǵysy keletin azamattardy qoldaýy kerek – Lázzat Ibragımova
ASTANA. KAZINFORM – Turǵyn úı naryǵyndaǵy baǵanyń sharyqtaýyna ne sebep jáne ony turaqtandyrý úshin qandaı sharalar qajet? Bul týraly Otbasy bankiniń basqarma tóraıymy Lázzat Ibragımova BIZDIÑ ORTA podkastynda aıtty.
Lázzat Ibragımova turǵyn úı naryǵynda ınvestıtsııalyq baspananyń úlesi shamadan tys artqanyn aıtty. Onyń pikirinshe, baǵaly qaǵazdar sekildi qarjy quraldaryna ınvestıtsııa salý úshin arnaıy bilim qajet. Investor qaı aktsııa men oblıgatsııanyń tıimdi ekenin jáne qaı kompanııaǵa qarjy quıý kerek ekenin jiti túsinýi tıis. Sondaı-aq ol aktsııalar naryǵy uzaq merzimge negizdelgenin atap ótti. Sarapshynyń sózinshe, turaqty tabysqa qarjyny keminde 5–10 jylǵa ınvestıtsııalaǵan jaǵdaıda ǵana qol jetkizýge bolady.
– Qazaqstandaǵy ınvestorlar qysqa merzimde tabys tabýǵa úırengen. Máselen, qańtarda 20 mln teńge salyp, jyl sońyna qaraı ony 30 mln teńgege satyp, 10 mln teńge paıda kórgisi keledi. Kópshiligi 50 paıyzdan joǵary tabys kútedi. Investıtsııalyq turǵyn úı naryǵynyń qarqyndy damýyna da osy úrdis áser etip otyr, - dedi Lázzat Ibragımova.
Sarapshy úshinshi ne tórtinshi baspanasyn alýdy kózdegen azamattarǵa ınvestıtsııanyń balama túrlerin qarastyrýǵa keńes beretinin aıtty. Onyń sózinshe, kóp jaǵdaıda adamdar asyǵys úı satyp alyp, naryqtaǵy suranysty qoldan arttyryp, ózine qajet emes páterlerdi ıelenip jatady.
– Turǵyn úı naryǵyn retteý úshin qatań sharalar qajet. Sonyń ishinde besinshi, altynshy jáne odan keıingi páterlerdi satyp alýdy shekteý maqsatynda salyqtyq júktemeni kúsheıtýge bolady. Sonda baǵa naryǵy da birshama turaqtanyp, bir deńgeıde qalyptasady, - dedi ol.
Spıker sózinshe, búgingi basty másele – turǵyn úı naryǵyndaǵy teńsizdik. Bireýler alǵashqy páterin alýǵa múmkindigi jetpeı júrse, endi bireýler besinshi nemese altynshy baspanasyn satyp alyp jatyr.
– Meniń jeke ustanymym boıynsha, «Otbasy bank» júzege asyryp otyrǵan barlyq turǵyn úı baǵdarlamalary eń aldymen baspanasy joq azamattarǵa baǵyttalýy tıis. Memleket barlyǵyna birdeı kómek kórsete almaıdy jáne oǵan mindetti de emes, alaıda ózderiniń alǵashqy páterin alǵysy keletin azamattardy qoldaýy qajet, - dep atap ótti Lázzat Ibragımova.
Osyǵan baılanysty qazirgi ýaqytta «Otbasy bank» ónimderi tórt negizgi sanatqa shoǵyrlanǵan. Birinshisi – kópbalaly otbasylar. Ekinshisi – damýynda ereksheligi bar nemese múgedektigi bar bala tárbıelep otyrǵan otbasylar. Úshinshisi – І jáne ІІ toptaǵy múgedektigi bar azamattar. Tórtinshisi – jetim balalar.
Birinshi kezekte kórsetiletin qoldaý – ol jaldaý tólemderin sýbsıdııalaý. Eger otbasynyń tabysy tómen bolyp, páter jaldap tursa, memleket jaldaý aqysynyń 50 paıyzyna deıin ótep beredi. Qazirgi tańda bul qoldaýdy shamamen 11 myń otbasy paıdalanyp otyr.
– Bir suhbatymda aıtqan tanymal sózim bar: «Memleket sizderdi penthaýspen qamtamasyz etýge mindetti emes». Biraq eń aldymen, otbasynyń óz menshigindegi alǵashqy 50 sharshy metri bolýy tıis. Iá, meniń oıymsha, dál osy jerde sýbsıdııalaý qajet. Jeńildetilgen nesıeler berý kerek, mundaı qoldaýdy da jalǵastyrý qajet, - dep túıindedi Lázzat Ibragımova.
Aıta keteıik, Qazaqstanda 43 myńnan astam kámeletke tolǵan jetim baspana ala almaı otyr.
