Memleket áleýmettik mindettemelerdi oryndaý úshin qarajatty qaıdan alady
NUR-SULTAN. QazAqparat – Memleket halyq aldyndaǵy áleýmettik mindettemelerin oryndaý úshin qarajat kózin qaıdan alady? Bul suraqqa Ulttyq ekonomıka mınıstri Rýslan Dálenov jaýap berdi, dep habarlaıdy QazAqparat tilshisi.
«Memlekettiń áleýmettik mindettemelerine shyǵaratyn shyǵyndary týraly aıtar bolsaq, bul rette eń aldymen keıbir shyǵyndardy ońtaılandyrýǵa qatysty tıisti tapsyrma bar. Investıtsııalyq jobalardyń keıbirin kelesi jylǵa ysyrýymyz múmkin. ıAǵnı bıylǵa josparlanǵan keıbir jobany bastamaı-aq qoıýǵa da bolady. Kelesi qarajat kózi – ótken jyldyń qorytyndysy boıynsha artylyp qalǵan kassalyq qaldyqtar. Onyń kólemi úlken bolmasa da barshylyq. Sonymen birge qarajat tartýdyń taǵy bir amaly - bıýdjet defıtsıti bolmaq. Sebebi ádisteme boıynsha defıtsıt kólemi JІÓ-niń 3 paıyzyna deıingi mólsherde bolýy kerek. Az kólemdegi defıtsıt te rezerv ekenin eskerý kerek», - dedi Rýslan Dálenov Úkimet otyrysynda ótken baspasóz máslıhatynda.
Mınıstrdiń aıtýynsha, sonymen qatar bıýdjettiń tabys túsetin bóligin de áleýmettik mindettemelerdi oryndaýǵa jumsaý kózdelgen.
«Memleket basshysynyń tapsyrmasy boıynsha shaǵyn jáne orta bıznes tabysqa túsetin salyqtan bıyldan bastap bosatylady. Bul – sıpaty jaǵynan daǵdarysqa qarsy shara. Munyń ózi de otandyq bıznesti syrtqy konıýktýranyń yqpal etýimen bizdiń ekonomıkada bolyp jatqan qubylmalylyqtan qorǵaıdy», - dedi mınıstr.
Eske sala ketsek, búgingi Úkimet otyrysynda Ulttyq ekonomıka mınıstri Rýslan Dálenov memleket áleýmettik mindettemelerin tolyq kólemde qarjylandyratynyn málim etken edi.
