Memleket aldynda qaryzy bar kompanııalardyń kóbine is qozǵalǵan - Memkiris komıteti

ASTANA. KAZINFORM – Memlekettik kiris komıteti Aýdıt departamentiniń basqarma basshysy Qaısar Aryn memleket aldynda qaryzy bar kompanııalarǵa qatysty túsinik berdi. 

- Memleket aldynda qaryzy bar kompanııalar men jeke kásipkerlerdiń boryshyn óndirip alý boıynsha suraqtar óte aýqymdy. Sondyqtan tıisti sheshimdi qajet etedi. Qazirgi kezde memleket aldynda salyq tóleýshilerdiń qaryzy 450 mlrd teńgeden asady. Onyń negizgi bóligin óndirip alýda qıyndyqtar týdyratyn bir sebebi – ol biraz kompanııalarǵa qylmystyq is qozǵalǵan. Bul rette jalǵan shot-faktýra jazý, salyqtan jaltarý baptary bar. Osy jaǵdaılarda óndirip alýda kedergiler bar, - dedi Q. Aryn áleýmettik jelide ótken brıfıngide.

Osy oraıda ol qaı jaǵdaıda salyq organdary boryshkerlerdiń múlkine óndirip alý sharasyn qoldanatynyn túsindirdi.

- Zańdy tulǵalar, jeke kásipkerler salyqty ýaqytynda tólemegende, Salyq kodeksi aıasynda habarlama joldanady. Bul rette táýekel dárejesi bar. ıAǵnı joǵary dárejeli táýekel bolsa, habarlama jiberilgennen keıin, bir jumys kúni ishinde biz múlkine shekteý is-qıyldaryn atqarýymyz kerek. Al orta dárejeli táýekel aımaǵynda bolsa, onda 15 jumys kúninde múlkin shekteý jumystaryn júzege asyramyz. Osy tártip Salyq kodeksiniń 120-babynda kórsetilgen. Múlkin shekteý degenimiz ne? Salyq tóleýshiniń tirkeýge qoıylǵan múlkine baılanysty jáne býhgaterlik teńgeriminde turǵan múlikine shekteý qoıamyz. Sonymen qatar, óndirip alý is-qımyldaryn atqaramyz, - dedi komıtet ókili.

Aıta keteıik, bıyl naýryz aıynda ótken Ulttyq quryltaıdyń IV otyrysynda Memleket basshysy Qasym-Jomart Toqaev ádil ári tıimdi salyq júıesin qurý kerek ekenin atap ótti.