Memqyzmetter úshin aqyny smartfon arqyly tóleý múmkindigi keńeıdi

ASTANA. QazAqparat - Bank kartasy men elektrondyq ámııany bar azamattarǵa aqshasyz qolma-qol eseptesýdi usynatyn onlaın-servıs iske qosyldy, dep habarlaıdy QazAqparat «Azamattarǵa arnalǵan úkimet» memlekettik korporatsııasynyń baspasóz qyzmetine silteme jasap.

«Azamattarǵa arnalǵan úkimet» memlekettik korporatsııasy «SmartPay» provaıderimen birge pılottyq tártipte fastpay.kz onlaın-servısin iske qosty. Endi aqshasyz qolma-qol eseptesýdi qalaıtyn azamattar keń taralǵan 37 memlekettik qyzmettiń aqysyn tek bank kartalary arqyly ǵana emes, «WebMoney», «Qiwi» jəne «WalletOne» elektrondyq ámııandary arqyly da tóleı alady.

Sondaı-aq onlaın-servıstiń kómegimen kólik, jer jáne múlik salyǵyn, ákimshilik aıyppuldar men jol erejesine qatysty aıyppuldardy tóleýge bolady. Aldaǵy ýaqytta bul tizim tolyǵa túsedi.

Jańa servıs - memlekettik qyzmetterge qoljetimdilikti arttyryp, halyqqa qyzmet kórsetý salasyn tsıfrlandyrýǵa jasalǵan kezekti qadam. Endi osy servıs iske qosylǵandyqtan, qyzmet alýshylar kassaǵa kezekke turmaı-aq, ınternet jelisi qosylǵan smartfon nemese basqa da gadjetpen  www.fastpay.kz  saıtyna kirip, tıesili memlekettik qyzmetke shuǵyl túrde tólem jasaı alady. Tólem jasalǵan soń azamattyń elektrondyq úkimet portalyndaǵy jeke kabıneti men elektrondyq poshtasyna elektrondyq chek bekitilgen habarlama kelip túsedi.