Memqyzmettegi synaq merzimine ózgerister engiziledi
ASTANA. QazAqparat - Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
«Ýaqyt bir orynda turǵan joq, Qazaqstannyń memlekettik qyzmeti turaqty jańǵyrý sharalaryn qoldanýdy talap etedi. Jaqynda ǵana elimizdiń Ata Zańyna ózgerister engizilip, ortalyq jáne jergilikti memlekettik organdardyń jaýapkershiligi men derbestigi kúsheıtildi. Memlekettik bılikti ortalyqsyzdandyrý jáne keıbir qyzmetterdi memlekettik organdarǵa berý jóninde zańdar qabyldandy. Atalǵan ózgerister memlekettik qyzmet týraly qoldanystaǵy zańnamaǵa túzetý engizý qajettigin alǵa tartyp otyr», - dep toqtaldy Májilis depýtaty Ersultan Bekturǵanov zań jobasyn tanystyrý kezinde.
Onyń sózine qaraǵanda, talqylaýlar barysynda memlekettik qyzmet zańynyń normalaryndaǵy problemalar men quqyqtyq qaıshylyqtar anyqtaldy. Osyǵan baılanysty Májilis pen Senattyń birneshe depýtattary bastama jasap, qoldanystaǵy zańnamaǵa qajetti ózgerister men tolyqtyrýlar engizý týraly sheshim qabyldady.
«Atap aıtqanda, tıisti óńirlik memlekettik organdardyń basshylary laýazymyna konkýrstyq irikteýden oıdaǵydaı ótken kandıdattardy ókiletti ortalyq memlekettik organdarmen kelisý tájirıbesin alyp tastaý qajettigi qaraldy. Sebebi memlekettik qyzmet týraly zańǵa sáıkes, konkýrstyq komıssııanyń oń qorytyndysyn alǵan úmitker tıisti laýazymǵa sózsiz ornalasý múmkindigine ıe bolady. Anyǵyraq aıtqanda, konkýrstyq komıssııanyń sheshimi konkýrs jeńimpazyn bos laýazymǵa taǵaıyndaý úshin negiz bolyp tabylady jáne bul qosymsha kelisýdi talap etpeıdi», - dedi Bekturǵanov.
Búginde zań talaptaryna sáıkes, synaq merzimi arnaıy tekserýden oń nátıjesi alynǵannan keıin ǵana eseptele bastaıdy. Dál sol kezden bastap konkýrstan ótip, qyzmetke kirgen adam memlekettik qyzmetshi bolyp sanalady.
«Bul rette arnaıy tekserý júrgizý merzimi 3 aıǵa deıin sozylady. Al synaq merzimi 3 aıdan bastalyp, keıbir jaǵdaılarda 6 aıǵa deıin sozylýy múmkin. Sonyń saldarynan azamattar 9 aıǵa deıin taǵaıyndaýdan ótpeı, qyzmetshi ózine tıesili áleýmettik qoldaýlardy tolyq ala almaıdy. Soǵan baılanysty biz synaq merzimin eńbek sharty qoldanyla bastaǵan kezden nemese konkýrstan ótip kelgen azamattyń jumysqa kelgen kúnnen bastap esepteýdi usynyp otyrmyz», - dedi depýtat.
