Memqyzmettegi ońtaılandyrý: 400 myń teńge jalaqyny kimder alady
Kezdesýge oblys ákimi Asqar Myrzahmetov, Qazaqstan Respýblıkasy Prezıdenti janyndaǵy Memlekettik basqarý akademııasynyń rektory Fatıma Jaqypova, Almaty jáne Shymkent qalalaryndaǵy, Almaty, Túrkistan jáne Qyzylorda oblystaryndaǵy aýmaqtyq departament basshylary qatysty.
Alık Shpekbaev faktorly-baldyq júıe men bonýstar negizindegi memlekettik qyzmetshilerdiń jańa eńbekaqy júıesi týraly baıandady. Ol memqyzmetkerlerdiń jalaqysyn eki esege arttyrý jáne ortalyq pen óńirler arasyndaǵy jalaqy aıyrmasyn 70%-dan 10%-ǵa deıin tómendetýdiń oń nátıjesin atap ótti. Sonyń arqasynda búginde bir bos memlekettik laýazymǵa eki úmitkerdiń ornyna alty adam keletin bolǵan.
Atalǵan ońtaılandyrýdy eskere otyryp, endi Ulttyq bıýro ortalyq apparatynyń ofıtserleri 232 myń teńgeniń ornyna - 410 myń teńge, al aýmaqtyq departament qyzmetkerleri 152 myńnyń ornyna - 350 myń teńgege jýyq eńbekaqy alatyn boldy.
«Biz basqarýshylyq laýazymdardy eki ese qysqarttyq, bul atqarýshy bılikti 25%-ǵa nyǵaıtty. Artyq qurylymdardy qysqarttyq, onyń ishinde aýdanaralyq basqarmalardyń úshten eki bóligin qosa alǵanda. 26 basqarma bólimderge, 34 bólim toptarǵa ózgertildi. Ortalyq basqarýdy kúsheıte otyryp, ishki qaýipsizdik aýmaqtyq departamentterin ońtaılandyrdyq», - dedi agenttik tóraǵasy.
Alık Shpekbaev qosalqy qyzmetterdi ortalyqtandyrý jáne kadrlyq qujat aınalymy boıynsha ortaq qyzmet kórsetý ortalyǵyn qurý tájirıbesi týraly áńgimeledi.
«Joǵary tıimdilik kórsetkishteri bar qyzmetkerler jyl saıynǵy jalaqy mólsherinde syıaqyǵa úmittene alady. Bul óz kezeginde ıpoteka rásimdeýge nemese avtokólik satyp alý úshin jaqsy múmkindik. «Ózgeristi ózińnen basta» prıntsıpi boıynsha, agenttik memlekettik apparatta ońtaılandyrý protsesin júrgizedi. Mysaly, eger biz barlyq memlekettik organdardyń kadrlyq protsesterin ortalyqtandyratyn bolsaq, sol arqyly jylyna 5,5 mlrd teńge únemdeımiz», - dedi ol.
Qazir personaldy basqarý qyzmetteri 14 ese tıimdi jumys isteıdi. «E-qyzmet» aqparattyq júıesiniń arqasynda bir kúnde 30 adamnyń ornyna 400-den astam adamǵa qyzmet kórsetiledi. Jyl sońyna deıin jalaqy esepteý fýnktsııasy beriledi. Sonymen qatar, memlekettik satyp alýlar men zań qyzmetteri ortalyqtandyrylǵan.
Agenttik tóraǵasy jumys sapary aıasynda QR Prezıdentiniń janyndaǵy Memlekettik basqarý akademııasy fılıalynyń ashylý rásimine qatysyp, Jambyl oblysy boıynsha Qazaqstan Halyq Assambleıasynyń múshelerimen, jergilikti jáne sheteldik ınvestorlarmen, bıznes-qaýymdastyq ókilderimen kezdesti.
