Memqyzmette sybaılas jemqorlyqtyń aldyn alýdyń mańyzy zor
ORAL. QazAqparat - Memlekettik qyzmette sybaılas jemqorlyqtyń aldyn alýdyń mańyzy zor. Bul týraly Oral qalasy ákimdiginde sybaılas jemqorlyqqa qarsy mádenıetti qalyptastyrý, jemqorlyq táýekelderine taldaý jáne memlekettik tártipti nyǵaıtý máselelerine arnalǵan semınarda aıtyldy, dep habarlaıdy QazAqparat.
Semınardy ashyp, júrgizgen QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basshysy, ádep jónindegi keńes tóraǵasy Bolat Isaqov Elbasy tapsyrmasyna sáıkes sybaılas jemqorlyqpen kúreske memleket tarapynan aıryqsha mán berilip otyrǵanyn, sondyqtan ony boldyrmaý jolynda barlyq tetikterdi iske qosý qajettiligin atap kórsetti. Eń bastysy, ár qyzmetshi jemqorlyq áreketterinen boıyn aýlaq salyp, óz qyzmetine adal bolýy tıis.
Jıynda atalmysh departamenttiń sybaılas jemqorlyqtyń aldyn alý basqarmasynyń basshysy Birjan Haırýllın qoǵamda sybaılas jemqorlyqqa qarsy mádenıetti qalyptastyrý joldary jóninde áńgimelese, memlekettik qyzmet salasyn baqylaý basqarmasynyń basshysy Jaqsat Muratov memlekettik organdardaǵy tártiptik komıssııalar jumysyn taldaý qorytyndysyn jarııa etti. Al bas maman Gúlnur Myrzaqaeva sybaılas jemqorlyq táýekelderin ishki taldaý máselesine toqtaldy.
Semınarda aıtylǵanyndaı, bıyl atalmysh departament 10 memlekettik organ men uıym qyzmetine syrtqy taldaý jasap, 129 jemqorlyq táýekel deregin anyqtaǵan. Óńirde 763 memlekettik qyzmetshi tártiptik jazaǵa tartylsa, sonyń ishinde 154 tártiptik materıal boıynsha 174 qyzmetkerge tártiptik jaza qoldanyldy. Bıylǵy toǵyz aıda memlekettik organdardaǵy 971 bos orynǵa konkýrs jarııalanyp, sonyń nátıjesinde 538 memlekettik qyzmetke qabyldandy. 
