Memqyzmetshiniń jemqorlyq áreketi úshin basshyǵa qandaı jaza beriledi

ASTANA. QazAqparat - Qazaqstanda qaramaǵyndaǵy qyzmetkerlerdiń sybaılas jemqorlyq áreketteri úshin birinshi basshylardyń jaýapkershiligi engizilip jatyr. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova málim etti, dep habarlaıdy QazAqparat tilshisi.

«Shyn máninde bul zań jobasynda qaramaǵyndaǵy qyzmetkerler jemqorlyqqa barsa, basshylardy jaýapkershilikke tartý týraly norma qarastyrylǵan», - dedi Shaıymova.

Osy oraıda, ol zań jobasynda teńdestirilgen qadamdar eskerilgenin jetkizdi.

«Birinshiden, bul másele tártiptik jaýapkershilikke qatysty bolǵandyqtan, zańnamanyń bekitilgen talaptaryna sáıkes, tıisti qyzmettik tekseris júrgiziledi. Qaramaǵyndaǵy qyzmetkerler jemqorlyq quqyq buzýshylyǵyn jasaǵanda ári faktiler rastalsa, onda tikeleı basshysy tártiptik jaýapkershilikke tartylady», - dep túsindirdi Agenttik ókili.

Bul turǵyda ol sot sheshimimen kúdikti adamǵa qatysty úkim zańdy kúshine engennen keıin, tıisti sharalar qabyldanatynyn aıtty.

«Tártiptik jaýapkershilikke tolyq emes qyzmettik sáıkessizdikten bastap, laýazymynan bosatýǵa deıingi sharalar kiredi. Bul turǵyda basshynyń qanshalyqty kináli ekendigi qarastyrylady. Árbir oqıǵa jekeleı qaralady, sondyqtan qaramaǵyndaǵy qyzmetkerlerdiń jemqorlyq áreketi úshin basshynyń tártiptik jaýapkershilikke tartylatyndyǵyn aıtyp otyrmyz. Óıtkeni memlekettik qyzmet týraly zańnamada jemqorlyqtyń aldyn alý boıynsha basshylardyń tıisti sharalardy atqarý mindeti qarastyrylǵan», - dedi A. Shaıymova.

Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.