Memqyzmetshilerge jalaqy baldyq shkalamen taǵaıyndalǵany durys - sarapshy
QOSTANAI. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblystyq departamentinde ótken jıynda memqyzmetshilerge eńbekaqy men syıaqy tóleý máselesi qozǵaldy, dep habarlaıdy QazAqparat tilshisi.
Bıyl Ult Josparynyń 5 jáne 6-qadamdaryn iske asyrý sheńberinde pılottyq rejımde ákimshilik memlekettik qyzmetshilerge eńbekaqy berýdiń jańa júıesi engizildi. Osylaısha, memlekettik qyzmetshilerdiń jalaqysy bekitilgen qaǵıdamen emes, atqarǵan jumysyna baılanysty eseptelmek.
Departamenttegi jıynda málim etilgendeı, bul pılottyq joba boıynsha memlekettik qyzmetshilerdiń eńbekaqysy eki bólikten turady. Birinshisi - kepildi jalaqy, ol faktorly-baldyq shkala arqyly belgilenedi. Al ekinshi bóligi - bonýs túrinde, ıaǵnı memlekettik qyzmetshiniń atqarǵan eńbegine baılanysty ball qoıylyp, tólem jasalady.
Memlekettik qyzmetshilerdiń jalaqysynyń kóterilýi sybaılas jemqorlyqtyń tómendeýine oń yqpalyn tıgizedi dep sanaıdy mamandar.
«Tómen eńbekaqy máselesi - jemqorlyq jasaýǵa ıtermeleıtin negizgi faktorlardyń biri. Sondyqtan da, memlekettik qyzmetshilerdiń jalaqysynyń kóterilýi sybaılas jemqorlyqtyń tómendeýine oń yqpalyn tıgizedi. Buǵan qosa ár memlekettik qyzmetshiniń materıaldyq turǵydan qamtamasyz etilýi onyń jumys sapasynyń tıimdi bolýyna áser etedi. Elimizde pılottyq joba retinde engizilgen júıe Kanada, Japonııa AQSh, Ulybrıtanııa, Sıngapýr, Malaızııa sııaqty álemniń damyǵan elderinde tıimdi qoldanyp júr. Bul ádis boıynsha qyzmetshilerdiń naqty júktelimin jáne memlekettik organnyń strategııalyq maqsattaryna jetýine onyń úlesin eskeretin bolady», - deıdi «Jańarý» sybaılas jemqorlyqqa qarsy jalpyulttyq qozǵalysynyń tóraǵasy Dastan Jumabaev.
QR Prezıdenti janyndaǵy Memlekettik basqarý akademııasynyń oblystyq fılıalynyń dırektory Qusna Tumanovanyń aıtýynsha, jumysqa endi qabyldanǵan jas mamandy memqyzmet usynatyn materıaldyq jaǵdaı qyzyqtyrmaı qoımaıdy.
«Eńbekaqy tóleýdiń jańa júıesiniń pılottyq jobasy kún tártibindegi ózekti másele. Qyzmetine jańadan kirisken azamat óziniń biliktiligi men bilimi, jan-jaqtylyǵyn kórsetýge tyrysady. Osy oraıda memleketik qyzmetshini yntalandyrý qajet. Sondyqtan synamaly túrde engizilip jatqan joba memlekettik qyzmetshilerdiń jumys nátıjesin arttyryp, jas mamandardyń memlekettik qyzmetke degen qyzyǵýshylyǵyn arttyrady», - dedi Qusna Tumanova.
Sarapshylardyń aıtýynsha, memlekettik qyzmetshilerge qoıylatyn jaýapkershilik joǵary jáne olardyń barlyǵy jumys kóleminiń ártúrli bolǵanyna qaramastan birdeı jalaqy alady. Sondyqtan da memlekettik qyzmetshilerge eńbekaqy tóleý faktorly-baldyq shkala tásilimen taǵaıyndalǵany jón.
