Memqyzmetshilerge smartfon berý: Fotoǵa túsirý fýnktsııasyn buǵattap tastaýy múmkin
"Bilýimshe, qazirgi kezde memlekettik qyzmetshilerge smartfon ustaýǵa ruqsat berýdiń birneshe joldary qaralyp jatyr. Máselen, uıaly telefonǵa ruqsat beredi, biraq ony qoldanýdyń naqty ınstrýktsııasy bolady. Sosyn texnıkalyq bir sheshim bar. Smartfondarǵa belgili bir baǵdarlamalardy júkteıtin shyǵar. Sonda uıaly telefonnyń kamerasy buǵattalyp qalady", - dedi E.Kósherbaev mınıstrlikte ótken kezdesýde.
Onyń aıtýynsha, aldymen qaýipsizdik pen aqparat qupııalyǵyna qatysty máselelerdi sheshý kerek. Al smartfondarǵa ruqsat berilse de, ol arqyly qyzmettik aqparatpen almasýǵa tyıym salynady. "Bylaısha aıtqanda, smartfondy tek jyldam baılanys úshin ǵana paıdalanady. Endi, qazir mamandar osy máseleni jan-jaqty zerdelep jatyr. Messendjerdi oılap tapsa, tipti jaqsy bolatyn edi. Biraq ázirshe naqty bir sheshim joq", - dep atap kórsetti E.Kósherbaev.
Aıta keteıik, búgingi kezdesýde QR Memlekettik qyzmet isteri jáne syıbaılas jemqorlyqqa qarsy kúres agenttigi SІM burynǵy jaýapty xatshysy Anarbek Qarashevtiń basqa da qylmystaryn jarııalady. "Qarashevtiń úıin tintý kezinde 1,5 mln AQSh dollary tárkilendi. Al Nurekenov 200 myń dollardy tyǵyp qoıdy. Qarashev ózine qarasty qyzmetkerlerden turaqty túrde para alǵany úshin aıyptalyp otyr. Al Sákenova, Nurekenov pen Jumasanova 28 mln teńgeden astam para alǵany úshin jaýapqa tartyldy. Ol aqshany xalyqaralyq sharalardy ótkizgen kásipkerler berip otyrǵan", - dedi agenttik tóraǵasynyń orynbasary Oljas Bektenov.
Oǵan qosa, Qarashev óziniń jıenine qarasty "Lara grýpp" atty fırmaǵa lobbı jasap kelgen. Ol kompanııa memlekettik qyzmetkerlerdiń sheteldik saparlaryna áýe bıletterin satyp alýmen aınalysqan. "Olar komıssııany artyq kórsetip, bıýdjettiń 9,8 mln teńgesin qoldy qylǵan. Sondaı-aq, Qarashev Ózbekstandaǵy Qazaqstannyń elshiligine kúrdeli jóndeý jumystary jasalmasa da, atqarylǵan jumystar jónindegi aktilerge qol qoıdy. Sonyń saldarynan bıýdjet 70 mln teńgeden astam aqshaǵa shyǵyndaldy. Osy iske mınıstrliktiń basqa da laýazymdy tulǵalary men elshilik qyzmetkerleri qatysýy ábden múmkin. Qazirgi kezde sotqa deıingi tergeý sharalary atqarylýda", - dep atap kórsetti O.Bektenov.
