Memqyzmetshilerdiń sana-sezimin qalaı ózgertýge bolady - Alık Shpekbaevtyń paıymy

ASTANA. QazAqparat - Memlekettik qyzmetshilerdiń, eń aldymen basshylardyń sana-sezimin jańǵyrtý ıkemdi daǵdyny damytýmen bastalýy tıis. Mundaı pikirdi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Feısbýktegi paraqshasy arqyly bildirdi, dep habarlaıdy QazAqparat.

«Elimizde «Rýhanı jańǵyrý» baǵdarlamasy júzege asyrylýda. Onyń aıasynda agenttik memlekettik qyzmetshilerdiń oılaýyn transformatsııalaýǵa baǵyttalǵan «Ózgeristerdi ózińnen basta» jobasyn júrgizýde. Osyǵan baılanysty ujymmen memlekettik qyzmetshilerge qatysty qalyptasqan sterotıpterdi ózgertýdiń jańa ádisterin qoldaný boıynsha «aqyl-oıǵa shabýyl» sharasyn ótkizdim. Oǵan egjeı-tegjeıli toqtalmaı, kezdesýde túıgen keıbir oılarymmen bóliskim keledi», - dedi ol.

Onyń paıymynsha, memlekettik qyzmetshilerdiń, eń aldymen basshylardyń sana-sezimin jańǵyrtatyn ıkemdi daǵdyny damytýmen bastalýy qajet.

«Bul aýqymy keń túsinik. Degenmen, is júzinde sóz tyńdaý jáne tyńdaı bilý qabileti jaıynda bolyp otyr. Taıaý bolashaqta joǵary emotsıalyq ıntellekt memlekettik qyzmetshilerdi irikteýdiń eń basty krıterııleriniń birine aınalatyndyǵyna shák keltirmeımin», - dedi Alık Shpekbaev.

Onyń paıymynsha, memlekettik qyzmetshiler arasyndaǵy júıeli buzýshylyqtarmen qandaı da bir kúsh qoldaný sharalarynsyz-aq kúresýge bolady.

«Jol qozǵalysy erejesin júıeli buzý, dórekilik, spırttik ishimdik ishý - munyń barlyǵy da memlekettik organdardyń qabyrǵasynda áli de bar. Biraq, bul qubylyspen qandaı da bir kúsh qoldaný sharasynsyz-aq kúresýge bolady. Áriptester minez-qulyqtyń mundaı modelderin qabyldaı amaıtyndyǵyn bir-birine ashyq aıtyp, al basshylyq ózderiniń is-áreketimen ony kórsetip, dáleldeýi tıis», - dedi agenttik basshysy.