Memqyzmetshilerdiń din salasyndaǵy ádebine qatysty jańa talaptar engiziledi
«Jobada memlekettik qyzmetshilerdiń din salasyndaǵy ádebine baılanysty birqatar talaptar naqtylanǵan. Jobaǵa memlekettik qyzmetshilerdiń Ádep kodeksinde kózdelgen úsh shekteý engizilgen. Olar: óziniń qyzmettik múmkindikterin dinı birlestikterdiń múddelerine paıdalanbaý, ózine baǵynystaǵy qyzmetshilerdi dinı qyzmetke májbúrlemeý, dinı birlestikti qurýǵa bastamashy nemese onyń múshesi bolmaý. Tıisti normany «Qazaqstan Respýblıkasynyń memlekettik qyzmeti týraly» Zańyna engizý usynylady. Jalpy, usynylatyn normalar azamattardyń din salasyndaǵy negizgi quqyqtaryna, mysaly jumys ýaqytynan tys kezde dinı is-sharalardy jáne resimderdi oryndaý nemese olarǵa qatysý quqyqtaryna áser etpeıdi», - dep atap ótti QR Din isteri jáne azamattyq qoǵam mınıstri Darhan Káletaev.
Budan basqa, memlekettik bıýdjetten jáne Ulttyq banktiń bıýdjetinen qarjylandyrylatyn uıym qyzmetkerlerin de osy normanyń bir bóligimen qamtý usynylady. Ol óz qyzmettik laýazymyn dinniń múddesi úshin paıdalanýyna jol bermeýge jáne baǵynysyndaǵy adamdardy dinı qyzmetke májbúrleýge jol bermeýge qatysty.
«Ekinshiden, dinı birlestikter qyzmetiniń zańnamaǵa sáıkestigin tekserýdi jáne baqylaýdy júzege asyrý maqsatynda mınıstrlikke jáne jergilikti atqarýshy organdarǵa tıisti quzyret berý jáne tekserýdi júrgizýdiń tártibin anyqtaý usynylady», - dedi Darhan Káletaev.
Dinı ahýalǵa monıtorıng júrgizý boıynsha jergilikti atqarýshy organdardyń fýnktsııalary engiziledi. Búgingi tańda oblystardyń, Astana jáne Almaty qalasy ákimdikteriniń Din isteri basqarmalary dinı ahýaldy, sondaı-aq óńirde áreket etetin dinı birlestikterdiń, mıssıonerlerdiń, dinı bilim berý uıymdarynyń qyzmetin zerdeleý quqyǵyna ıe. Alaıda, aýdandyq deńgeıde mundaı ókilettik joq. Al aýdandyq ákimdikter din salasyndaǵy máselelermen aınalysady, sonyń ishinde óńirdegi dinı ahýalǵa taldaý júrgizedi, ákimshilik quqyqbuzýshylyq týraly hattamalar toltyrady. Osyǵan baılanysty, aýdan ákimdikterine atalǵan quzyretti zańnamalyq deńgeıde bekitý usynylady.
Budan bólek, Qylmystyq-atqarý júıesi komıtetine sottalǵandardy ońaltý boıynsha jumysty uıymdastyrýdyń erejelerin bekitý boıynsha quzyretter beriledi. Sonymen qatar, zań jobasy dinı qyzmetpen baılanysty qylmystardyń aldyn alý boıynsha Іshki ister mınıstrliginiń fýnktsııasyn keńeıtýdi kózdeıdi.
