Memqyzmetshilerdiń din salasyndaǵy ádebine baılanysty talaptar naqtylandy

ASTANA. QazAqparat - Senattyń Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy talqylandy, dep habarlaıdy QazAqparat tilshisi.

Zań jobasynyń eń mańyzdy normalary shartty túrde úsh blokqa bólingen. Onyń alǵashqysyna dindi destrýktıvti maqsattarǵa qoldanýǵa jol bermeýge baǵyttalǵan túzetýler kiredi.

«Atap aıtqanda, «destrýktıvti dinı aǵym» jáne «dinı radıkalızm» degen jańa uǵymdar engiziledi. Bul uǵymdardy engizý jáne destrýktıvti dinı aǵymdardyń ıdeologııasyn, atrıbýttary men syrtqy belgilerin taratýǵa tyıym salý arqyly syrttan elimizge jat ıdeologııanyń enýine tosqaýyl qoıýǵa múmkindik beredi. Sondaı-aq jobada bet-álpetti tanýǵa kedergi keltiretin kıim-keshekti qoǵamdyq oryndarda kıip júrýge tyıym salý kózdelgen. Mundaı sharalardy engizý azamattardyń qaýipsizdigi úshin qajet. Osy tektes normalar Belgııanyń, Frantsııanyń, Bolgarııanyń, Avstrııanyń jáne basqa da birqatar memleketterdiń zańdarynda qoldanylady. Bul norma dinge ǵana qatysty emes, sol sebepti ol «Quqyq buzýshylyqtyń aldyn alý týraly» zańǵa engizilip otyr», - dedi QR Qoǵamdyq damý vıtse-mınıstri Berik Aryn. 

Sonymen qatar jobada memlekettik qyzmetshilerdiń din salasyndaǵy ádebine baılanysty birqatar talaptar naqtylanǵan. Jobaǵa memlekettik qyzmetshilerdiń Ádep kodeksinde kózdelgen úsh shekteý engizilgen. Olar: óziniń qyzmettik múmkindikterin dinı birlestikterdiń múddelerine paıdalanbaý, ózine baǵynystaǵy qyzmetshilerdi dinı qyzmetke májbúrlemeý, dinı birlestikti qurýǵa bastamashy nemese onyń múshesi bolmaý.

Ǵıbadat úılerinen tys jerlerde nekeni qııý nemese toqtatý boıynsha dinı joralǵylar men rásimderdi jasaýǵa jol bermeý eskerilgen. Dinı jolmen nekege turýǵa nıet bildirgen adamdardyń bireýi ǵıbadat ǵımaratyna kele almaıtyn jaǵdaıda (aýyr naýqastanýy, múgedektigi, bas bostandyǵynan aıyrý oryndarynda bolýy),  bul dinı rásimdi medıtsınalyq nemese ózge de uıymda nekege otyratyn adamdardyń qatysýymen tirkelgen dinı birlestiktiń ókili júrgize alady.

 «Kámeletke tolmaǵandardy dinı qyzmetke zańsyz tartýdan qorǵaý deńgeıi kúsheıedi», - dedi vıtse-mınıstr.

Talqylaýdan keıin komıtet músheleri zań jobasyn Senattyń jalpy otyrysyna birinshi oqylymǵa shyǵarý týraly sheshimdi qabyldady.