Memqyzmetshilerdiń ar-uıatyn áli de ushtaý qajet - Fatıma Jaqypova

ASTANA. QazAqparat - Bıylǵy Joldaýda Memleket basshysy Nursultan Nazarbaev jemqorlyqpen kúres máselesine basa nazar aýdardy. Sebebi sońǵy úsh jylda ǵana joǵary laýazymdy sheneýnikter men memlekettik kompanııalardyń basshylaryn qosa alǵanda, jemqorlyq úshin 2,5 myńnan astam adam sottaldy. Memlekettik basqarý akademııasynyń rektory Fatıma Jaqypova osy máselege qatysty óz pikirin bildirdi, dep xabarlaıdy QazAqparat tilshisi.

Onyń aıtýynsha, búginde memlekettik qyzmet salasynda merıtokratııa, ıaǵnı adal ári nátıjeli eńbektiń arqasynda jumys babymen kóterilý prıntsıpteri iske asa bastady. Akademııa basshysy naqty málimetterdi de keltirdi.

"Máselen, ótken jyly respýblıka boıynsha 23 587 ishki konkýrstar jarııalanǵan bolatyn. Barlyq konkýrstardyń nátıjesi boıynsha shamamen 10 000 adam qyzmetke taǵaıyndaldy. Sonyń ishinde 5 500 memqyzmetkerdiń laýazymy ósti. Árıne, merıtokratııada adamnyń barlyq jetistikteri eskeriledi. Alaıda ar-uıat degen qasıettiń orny bólek. Sebebi memlekettik qyzmetkerdiń ar-uıaty neǵurlym joǵary bolsa, onyń jemqorlyqqa boı aldyrmaýy da soǵurlym basym bolady", - dedi F.Jaqypova búgin Astanada ótken baspasóz máslıxatynda.

Rektordyń sózine qaraǵanda, ótken jyly barlyq memlekettik qyzmetkerlerdi attestatsııadan ótkizý kezinde shamamen 66 000 adam arnaıy test tapsyrdy.

"Iá, sol kezde keıbir qyzmetkerlerdiń ar-uıat degen qasıeti aıqyn baıqalmady. Degenmen, biz arnaıy baǵdarlamany ázirlep, memlekettik qyzmetkerlerdi ózin-ózi ustaýǵa, ádep erejelerin saqtaýǵa úırete bastadyq. Osy oraıda Memlekettik qyzmet isteri agenttiginiń, sonyń ishinde etıka boıynsha arnaıy ýákilderdiń jumysyn erekshe atap ótken jón. Árıne, jemqorlyq áreketteri bar. Ony Memleket basshysy da óz Joldaýynda kórsetti", - dep atap kórsetti F.Jaqypova.

Aıta ketken jón, Prezıdent jemqorlyqpen kúres máselesin bıylǵy Joldaýdyń negizgi basymdyqtarynyń biri retinde kórsetti.

"Jemqorlyqtyń aldyn alýǵa baǵyttalǵan kúres jalǵasa beredi. Kóp jumys istelip jatyr. Sońǵy 3 jylda ǵana joǵary laýazymdy sheneýnikter men memlekettik kompanııalardyń basshylaryn qosa alǵanda, jemqorlyq úshin 2,5 myńnan astam adam sottaldy. Osy ýaqyt ishinde olardyń 17 mıllıard teńge kóleminde keltirgen zalaly óteldi. Memlekettik organdardaǵy protsesterdi, sonyń ishinde olardyń halyqpen jáne bıznespen qarym-qatynasyn tsıfrlandyrý mańyzdy bolyp sanalady. Atap aıtqanda, azamattar óz ótinishteriniń qalaı qarastyrylyp jatqanyn kórip, der kezinde sapaly jaýap alýǵa tıis", - delingen toǵyzynshy taraýda.