Memqyzmetshilerdiń Ádep kodeksi normalaryn buzýy sıreı bastady - Aqmola oblysy
Vedomstvonyń málimeti boıynsha, Ádep keńesiniń jumysy tártiptik isterdi qaraýdan góri memlekettik qyzmet pen jemqorlyq salalaryndaǵy júıelik máselelerdiń aldyn alýdy jáne olardy sheshýdi kózdeıdi. Qazirgi kezde qaralyp jatqan máselelerdiń 70 paıyzy quqyq buzýshylyqtardyń aldyn alýǵa baǵyttalǵan.
«Ótken jyly Keńestiń 13 otyrysy ótip, onda 97 másele qaraldy, onyń ishinde: 14 - ol memlekettik qyzmet pen jemqorlyqqa qarsy is-qımyl týraly zańnama talaptaryn buzýdyń aldyn alý boıynsha jumys qorytyndylary, 6 - jemqorlyq táýekelderin taldaý, 11 - ádep jónindegi ýákilderdiń atqarǵan qyzmetiniń qorytyndylary, 8 tártiptik komıssııalardyń atqarǵan qyzmetiniń qorytyndylary, 29 ózge máseleler jáne 29 tártiptik ister», - deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Aqmola oblysy boıynsha departamentiniń memlekettik qyzmet salasyndaǵy baqylaý basqarmasynyń basshysy Qaıyrjan Sultanǵazıev.
Basqarma basshysynyń aıtýynsha, Ádep jónindegi keńes memlekettik qyzmetshilerdi tártiptik jaýapqa tartý jónindegi sheshimderdi kóbine qabyldamaýǵa tyrysady. Bul keńestiń ádildigin jáne birbetkeıligin kórsetedi. 2018 jyl ishinde 3 tártiptik is toqtatylyp, memlekettik qyzmetshilerdiń quqyqtary qorǵaldy. Sonymen qatar, ádeppen baılanysty quqyqbuzýshylyqtardyń tómendegeni baıqalady. Máselen, ótken jyly Ádep kodeksiniń normalaryn buzǵany úshin Ádep jónindegi keńestiń usynysymen 15 memlekettik qyzmetshi jaýapqa tartyldy. Al 2017 jyly olardyń sany 17-ni quraǵan.