Memqyzmetshilerdi kúızelisten qutqaratyn saıt ashyldy
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Ońtústik Qazaqstan oblysy boıynsha departamenti memkyzmet.kz atty kómekshi saıtty iske qosty, dep xabarlaıdy QazAqparat tilshisi.
"Atalǵan portal arqyly biz ózimizdi kórseteıin dep jatqan joqpyz. Onda xalyqqa ǵana emes, memlekettik qyzmetkerlerge de qajetti aqparat bar. Máselen, qazirgi kezde attestattaý jumysy júrgizilip jatyr. Attestatsııa barysynda memlekettik qyzmetkerlerdiń biliktiligi tekserilip, sonyń nátıjesi boıynsha adamdy qyzmeti jaǵynan ne kóteredi, ne tómendetedi. Osyǵan baılanysty memqyzmetkerler arasynda úlken alańdaýshylyq bar. Bári qobaljyp júr, kúızeliske túsetinder de az emes. Biz bolsaq, "Attestattaý" degen aıdarda memqyzmetkerlerdi alańdatyp júrgen materıaldardy jarııaladyq. Sonyń ishinde agenttiktiń attestatsııalyq komıssııaǵa qoıyp otyrǵan talaptary bar. Budan bólek, suraq-jaýaptyń úlgileri de jarııalandy. Osylaısha, men attestatsııany tapsyratyn bolsam, saıtqa kirip, qajetti aqparatpen tanysa alamyn. Sol arqyly komıssııanyń meni qalaı baǵalaıtynyn biletin bolamyn", - deıdi departamenti basshysy Álı Kómekbaev.
Onyń aıtýynsha, departament ókilderi oblysta memqyzmetkerler arasynda attestatsııaǵa qatysty alańdaýshylyqtyń bar ekenin kórgennen keıin saıtty tezdetip qosyp, ishine tıisti aıdardy qosqandy jón kórdi. Qazirgi kezde atalǵan portaldy qoldanýshylardyń sany kún sanap artyp keledi.
Saıttyń qoldanýshylary attestattaýdan bólek memlekettik qyzmetke kirý tártibi, bos jumys oryndary, memqyzmetke turýǵa qajetti qujattar, tıisti zań normalary jáne taǵy basqa aqparatty taba alady. Osylaısha, jańa saıttyń kómegi memlekettik qyzmetkerlerge ǵana emes, memlekettik qyzmetke turǵysy keletin jáne memlekettik qyzmetterdi qoldanatyn xalyqqa tıedi degen jospar bar. "Qazirgi kezde keıbir memlekettik organdarda artyq qujattardy talap etip jatady. Biz bolsaq, jańa saıtta memlekettik qyzmetterdiń tizimin jarııaladyq. Sonyń negizinde memlekettik organ emes, sol qyzmetti alyp otyrǵan adam ózine qajetti anyqtamany artyq qujattarsyz talap ete alady", - dep atap kórsetti Kómekbaev. Al memlekettik qyzmetke turǵysy keletin azamattar arnaıy test suraqtaryna jaýap berip, óz bilimin teksere alady.
