Memqyzmetshiler balalardy qashyqtan oqytýǵa bólingen noýtbýkterdi jymqyrǵan – agenttik

NUR-SULTAN. QazAqparat – Soltústik Qazaqstan oblysynda bilim berý bóliminiń qyzmetshileri tabysy tómen otbasylardyń balalaryna arnalǵan noýtbýkterdi jymqyrdy degen kúdikke ilikti. Bul týraly QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov málim etti, dep habarlaıdy QazAqparat tilshisi.

«Soltústik Qazaqstan oblysy boıynsha Syıbaılas jemqorlyqqa qarsy qyzmet tarapynan oblys aýdandarynyń birindegi ákimdiktiń bilim berý bóliminiń qyzmetshilerine qatysty sotqa deıingi tergeý bastaldy. Olar aýdandaǵy az qamtylǵan otbasylardaǵy mektep oqýshylaryna pandemııa kezinde Úkimet rezervi esebinen Bilim basqarmasy satyp alǵan noýtbýkterdiń bir bóligin jymqyrý kúdigine ilikti», - dedi D. Bekaıdarov onlaın rejımdegi brıfıngide.

Osy qylmystyń saldarynan memleketke keltirilgen shyǵyn 12 mln teńgeden asyp tústi.

«Tergeý múddesine baılanysty istiń mán-jaıy jarııalaýǵa jatpaıdy. Іs boıynsha tıisti sheshim tergeý amaldaryn júrgizý nátıjesi boıynsha qabyldanady», - dedi ol.