Memqyzmetshiler BAQ pen áleýmettik jelidegi synǵa durys jaýap berýdi úırenedi

NUR-SULTAN. QazAqparat - Memlekettik qyzmetshiler BAQ pen áleýmettik jelilerdegi rezonanstyq jarııalanymdarǵa durys jaýap berýdi úırenedi, dep habarlaıdy QazAqparat Memlekettik qyzmet isteri agenttiginiń baspasóz qyzmetine silteme jasap.

Búgin Astanada Memlekettik qyzmet isteri agenttiginiń tóraǵasy Anar Jaıylǵanovanyń tóraǵalyǵymen aldaǵy kezeńge arnalǵan jumys basymdyqtaryn talqylaý boıynsha keńeıtilgen otyrys ótti. Kún tártibinde memlekettik qyzmetshilerdiń azamattarmen tıimdi jáne sapaly is-qımyly jóninde aıtyldy.

«Prezıdenttiń Úkimettiń keńeıtilgen otyrysynda aıtylǵan tapsyrmasyn oryndaý úshin memlekettik qyzmetshilerdiń azamattarmen ózara is-qımyl daǵdylaryn damytýǵa erekshe kóńil bólý, olardy Memlekettik basqarý akademııasynyń bazasynda BAQ-taǵy, áleýmettik jelilerdegi rezonanstyq jarııalanymdarǵa durys áreket ete bilýge úıretý qajet», - dedi vedomstvo basshysy.

Akademııaǵa birinshi kezekte jergilikti atqarýshy organdardyń basshylyqtaǵy qyzmetkerlerine osyndaı daǵdylardy oqytý baǵdarlamasyn ázirleý tapsyryldy.

«Memleket basshysy Sheteldik ınvestorlar keńesiniń otyrysynda bilim berý júıesi - ekonomıkanyń bir bóligi ekenin atap ótti. Árbir memlekettik qyzmetshiniń biliktiligi, halyqpen jáne halyqtyń múddesi úshin jumys isteý qabileti - memlekettik apparat pen qoǵam arasynda senimdi qarym-qatynas qurýdaǵy negizgi element bolady», - dedi vedomstvo basshysy.

Anar Jaıylǵanovanyń sózinshe, memlekettik organdarǵa júgingen azamattardyń múddesi men quqyqtaryn qorǵaýǵa erekshe nazar aýdarylady.

«Búgingi tańda agenttikke kelip túsken ótinishter sanynyń óskeni baıqalady, bul - halyqtyń bizdiń jumysymyzǵa degen seniminiń kórsetkishi. Osy rette, biz olardyń sapaly jáne ýaqtyly qaralýyn qamtamasyz etýge mindettimiz. Árbir shaǵym jan-jaqty zerdelenip, qısyndy aıaqtalýǵa tıis», - dedi agenttik tóraǵasy.

Anar Jaıylǵanova ótinishterdi sapasyz qaraý faktileri taldanyp, kinálilerge qatysty eleýli sharalar qabyldanatynyn eskertti.