Memqyzmetshiler Arystaǵy balalar úıiniń tárbıelenýshilerimen kezdesti

ARYS. QazAqparat – Túrkistan oblysy Arys qalasyndaǵy T.Tájibaev atyndaǵy otbasy úlgisindegi balalar úıinde búldirshinderimen rýhanı kezdesý ótti. «Meıirim nury» aktsııasy aıasynda óńirdegi Sybaılas jemqorlyqqa qarsy is-qımyl departamentiniń qyzmetkerleri tárbıelenýshilerimen jaqyn tanysyp, olardyń oı túkpirindegi asqaq armandary men ómirlik maqsattary jaıynda ashyq áńgime júrgizdi, dep habarlaıdy QazAqparat tilshisi.

Jetkinshektermen rýhanı kezdesý barysynda memlekettik qyzmetshiler balalarǵa meıirim sáýlesin seýip, olardyń ómirge degen ynta-jigerin arttyrýǵa jáne qoǵamǵa degen berik senimin qalyptastyrýǵa tyrysty.

Atalǵan sharada departamenttiń jeke quramy men qyzmetkerleri 62 jetkinshekpen suhbattasty. Tanysý barysynda balalar sahnalyq qoıylym qoıyp, ónerin ortaǵa saldy. Ómirmen órilgen óleń-jyrlaryn oqyp, anaǵa degen sarqylmas saǵynyshtan týǵan áýezdi ánderin shyrqady.

Іzgilik jolyndaǵy aktsııada búldirshinderdiń týma talantyn joǵary baǵalaǵan departament qyzmetkerleri balalarǵa mýzykalyq aspaptar men oı-órisin damytatyn túrli oıyn quraldaryn tabys etti.

Al, departament basshysy H.Kóshqalıev balalar aýylyndaǵy árbir búldirshin 7 basqarmanyń jiti nazarynda bolatynyn jáne olarmen birge ár aı saıyn óńirdiń tarıhı-mádenı ortalyqtary men demalys oryndaryna ekskýrsııalar turaqty túrde ótkizilip turatynyn jetkizdi.

Sondaı-aq, aldaǵy ýaqytta departamenttiń bastamasymen Arys qalasyndaǵy balalar aýylynyń búldirshinderimen kezdesýler uıymdastyrylady.