Memqyzmetshiler áleýmettik jelilerdegi akkaýnttary jóninde esep berýge mindetteledi
ASTANA. QazAqparat - Reseılik sheneýnikter jumys berýshilerge áleýmettik jelilerdegi ózderiniń akkaýnttary, blogtary men forýmdary jóninde aıtyp otýrǵa mindettelmek.
Osyndaı alǵashqy esepti memlekettik qyzmetshiler 2017 jyldyń 1 sáýirine deıin usynýy tıis, dep habarlaıdy QazAqparat «Izvestııa» gazetine silteme jasap.
«Memlekettik azamattyq qyzmet laýazymdaryna ornalasýǵa úmitti Reseı azamattarynyń ınternet jelisindegi saıttardyń meken jaılary nemese saıttardyń paraqshalary týraly málimetterdi usynyp otyrý mindetteri aıqyndalýda», - dep keltirdi Eńbek mınıstrligi ókiliniń sózderin basylym.
Alynǵan málimetter jurtshylyqqa taratylmaıtyndyǵy aıtylyp otyr. Bul rette, esep berýden bas tartý nemese tolyq aqparat usynbaý sheneýniktiń qyzmetimen qosh aıtysýyna sebep bolýy múmkin.
Eńbek mınıstrliginen basylymǵa málim etkendeı, mundaı aqparattardy jınaýdaǵy maqsat - «azamattyq qyzmetshilerdiń kásibı ádep erejelerin saqtaýyn qamtamasyz etý».
Qazirgi ýaqytta Eńbek mınıstrligi tıisti málimetterdi jınaý úshin arnaıy úlgini ázirleýde. Odan keıin ol úkimette bekitiletin bolady. Memqyzmetshilerdiń áleýmettik jeliler men blogtardaǵy belsendiligi týraly mindetti esep berýdi engizýge 2016 jyldyń 1 shildesinde kúshine engen «Memlekettik azamattyq qyzmet týraly» (79-FZ) zańnyń 20.2 baby negiz boldy.
