Memqyzmetshige 2 myń teńge bergen elordalyqtyń basy pálege qaldy

ASTANA. QazAqparat - Elorda turǵyny salyq qyzmetshisine aqshalaı rızashylyq beremin dep aıyppul tóleıtin boldy. Ol 2 myń teńgeni salyq esep-qısabyn ótkizýge kómek bergeni úshin bermek bolǵan, dep habarlaıdy QazAqparat tilshisi.

«2018 jyldyń 29 maýsymynda belgisiz adam aldyn ala kelisiminsiz Esil aýdandyq memlekettik kirister basqarmasy janama salyqtardy ákimshileý basqarmasynyń bas mamanyna salyq esep-qısabyn ótkizýge kómek bergeni úshin 2 myń teńge kóleminde aqsha bergen. Bul jaıynda Memlekettik kirister basqarmasynyń bas mamanynyń ózi habarlaǵannan keıin belgili boldy. Astana qalalyq memlekettik kirister departamentiniń ishki qaýipsizdik basqarmasy  júrgizgen tekserý sharasy barysynda laýazymdy tulǵaǵa qatysty quqyqqa qaıshy áreket jasaǵan elorda turǵyny anyqtaldy», - delingen Astana qalalyq memlekettik kirister departamenti taratqan aqparatta.

Vedomstvo málimetinshe, Іshki qaýipsizdik basqarmasy qala turǵynyna qatysty «bas mamanǵa zańsyz materıaldyq syıaqy usynaý» faktisi boıynsha materıaldar jınap, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalalyq departamentine joldaǵan. Nátıjesinde atalǵan azamatshaǵa qatysty QR Ákimshilik quqyq buzýshylyq týraly kodeksiniń 676-baby boıynsha ákimshilik hattama toltyrylyp, sot organdarynyń qaraýyna jiberilgen.

«2018 jyldyń 25 shildesinde Astana qalasynyń mamandandyrylǵan aýdanaralyq ákimshilik sotynyń qaýlysymen atalǵan azamatsha QR Ákimshilik quqyq buzýshylyq týraly kodekstiń 676 baby boıynsha kináli dep tanyldy jáne 336 700 teńge kóleminde aıyppul salyndy», - dep atap ótedi departament baspasóz qyzmeti.