Memqyzmetkerlerdiń memlekettik tildi bilýin mindetteý kerek – Qanat Tósekbaev
«Til – eń asyl qundylyq. Tildi órkendetý - barshanyń isi. Til – tek qarym-qatynas quraly emes, ultymyzdyń bıik tuǵyry. Bul rette bizdiń memleketimizdiń tilge degen janashyrlyǵy basym. Memleket basshysynyń búgingi «Táýelsizdik bárinen qymbat» atty jaryq kórgen maqalasyndaǵy basym baǵyttarynyń biri – memlekettik tildi jan-jaqty damytýdy basty nazarda ustaý, qoǵamda qazaq tiliniń memlekettik dárejesin nyǵaıtý elimizdiń saıasatynyń basty basymdyǵy bolyp qala beredi. Qoǵamda, memlekettik qoldaý múmkindigi joǵary salalarda, memlekettik mekeme qyzmetkerleri arasynda qazaq tiliniń qoldanys aıasy edáýir keńeıip kele jatyr, jumys berýshi tarapynyń basty nazarynda – qazaq tilin jetik meńgerýi dep aıtýǵa tolyq negiz bar», - deıdi Q. Tósekbaev.
Spıker qazirgi qoǵamda jastardyń belsendiligi joǵary ekenin, jastarǵa basa nazar aýdarý arqyly til saıasatyn júrgizý mol jemis beretinin atap ótti.
Sonymen birge, Q. Tósekbaev basshylyq qyzmet, memlekettik qyzmetshilerge, depýtattyqqa úmitkerlerdi memlekettik tildi jetik meńgerýdi mindetteýdi usyndy.
«Elimiz táýelsizdik alǵaly beri tól tilimiz memlekettik mártebege ıe bolyp, qoldanys órisi keńeıdi. Qazirgi tańda óner, ádebıet, mádenıet, baspasóz, radıo, teledıdarymyz 90-jyldarǵa qaraǵanda áldeqaıda «qazaqsha saırap tur» desek bolady. Bul bizdiń memlekettik tilimizdiń mártebesiniń asqaqtaǵany. Bul, osy ýaqytqa deıin barlyq yqtımal jaǵdaıdy jete baǵamdaı otyryp júrgizilgen memlekettik til saıasatynyń nátıjesi.
«Ana tili degenimiz – sol tildi jasaǵan, jasap kele jatqan halyqtyń baıaǵysyn da, búgingisin de, bolashaǵyn da tanytatyn, sol halyqtyń máńgiliginiń máńgilik máselesi. Ana tilin tek ógeı uldary ǵana mensinbeıdi, ógeı uldary ǵana aıaqqa basady», dep Ǵ. Músirepov aıtqandaı eldiń bolashaǵyn, tildiń bolashaǵyn saqtaý barshanyń mindeti. Qazirgi jahandaný kezeńinde elimizdiń aqparattyq keńistigin álemdik standarttarǵa saı keńeıte otyryp, memlekettik tildi ulttyq qaýipsizdiktiń mańyzdy bir nysany retinde jetildirýdi jáne qorǵaýdy jan-jaqty qamtamasyz etkenimiz abzal», - deıdi Qanat Tósekbaev.
Eske sala ketsek, búgin Qazaqstan Respýblıkasynyń Prezıdenti Qasym-Jomart Toqaev «Egemen Qazaqstan» gazetinde «Táýelsizdik bárinen qymbat» atty maqala jarııalady.
