Memqyzmetshilerge qashyqtan jumys isteýge múmkindik beretin tsıfrlyq jumys orny qurylyp jatyr
ASTANA. KAZINFORM – Memlekettik qyzmetshilerge qashyqtan jumys isteýge múmkindik beretin tsıfrlyq jumys orny qurylyp jatyr. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty.
- Jasandy ıntellekt mınıstrligi memlekettik qyzmetshiler úshin qaýipsiz tsıfrlyq jumys ornyn qurý baǵytynda jumys istep jatyr. Atalǵan jumys ortasy kúndelikti qyzmettik jumys úshin, onyń ishinde Qazaqstannan tysqary jerde tolyqqandy qashyqtan jumys isteý úshin barlyq negizgi quralǵa ıe bolady. Biz bul memlekettik apparattyń tıimdiligin arttyrady dep sanaımyz, - dedi Jaslan Mádıev.
Sonymen qatar ol bıylǵa arnalǵan ortalyq memlekettik organdardyń negizgi mindetteri derektermen sapaly jumys jasaý, memlekettik fýnktsııalardy qaıta qurý, jasandy ıntellekt, IoT-tehnologııalar, tsıfrlyq egizder men drondardy engizý ekenin aıtty.
- Buǵan deıin de ákimdikterdiń baılanys ınfraqurylymy men halyqtyń tsıfrlyq keńseleri boıynsha mindetterin aıtqan bolatynmyn. Sonymen qatar ákimdikterge TUMO jáne Tomorrow School sııaqty bilim berý bastamalarynyń jıyntyǵymen Astana Hub úlgisi boıynsha óńirlik IT-habtardyń alańyn edáýir ulǵaıtýdy jáne damytýdy tapsyrýdy suraımyz. Bul ortalyqtar tehnologııalyq ultty qurý jolynda jas urpaqtar tartylatyn bilim oshaǵy bolady, - dedi vıtse-premer.
Buǵan deıin memlekettik organdar zańnamamen bekitilgen aqparattyq qaýipsizdik talaptaryn jıi buzatynyn jazǵan edik.
