Memqyzmet alý áleýmettik jeli men messendjer paıdalanǵandaı ońaı bolýy kerek - mınıstr
Elimizde azamattardyń talap-tilekterin jyldam ári sapaly oryndaý úshin jasandy ıntellekt tehnologııasy engizilip jatyr. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy Kazinform.
«Qazir jas baladan bastap zeınetkerge deıin ár azamat áleýmettik jelilerdi, WhatsApp nemese Telegram messendjerlerin paıdalana alady. Sol sııaqty qyzmetterimiz túsinikti jáne ońaı bolýy tıis. Tsıfrlyq formatta bolsa da kebir qyzmetterdi alýda qıyndyqtar bar. Mysaly, qazir árbir paıdalanýshy elektrondyq qoltańbany alý, ony kompıýterde ornatý, parolin umytý sııaqty qıynshylyqtarǵa tap bolady. Ol úshin birinshiden, qyzmetterdi barynsha smartfon nemese proaktıvti túrge kóshirý, suranystardy tek bıometrııa nemese QR arqyly rastaý ár salada engiziledi», — dedi Baǵdat Mýsın.
Ekinshiden, onyń aıtýynsha, azamattardyń talap-tilekterin ChatGPT sııaqty jyldam ári sapaly oryndaý úshin jasandy ıntellekt tehnologııasy engizilip jatyr.
Bul kúni-túni azamattardyń qujattaryn rásimdeýge, jalpy barlyq suraqtarǵa jaýapty, qyzmetterdi tikeleı chatta alýǵa múmkindik beredi.
«Úshinshi basty baǵyt — bıznesmenderge arnalǵan servısterdi damytý. Azamattardyń ómirlik kezeńderi sııaqty bıznes júrgizýde kezdesetin jaǵdaılar qaıta qaralady, qyzmetter men servısterdiń jańa formaty engiziledi. Osylaısha tsıfrlyq servısterdiń sanyn kóbeıtý ǵana emes, memlekettik organdarmen birlesip, eski protsesterdiń reınjınırıngin jáne ár baǵytta jańa tehnologııalardy engizý jumysy jalǵasady», — dedi Baǵdat Mýsın.
