Memqyzmet agenttigi qyzmetshilerge múlikten kirý alý quqyǵyn beretin normany túsindirdi
ASTANA. KAZINFORM — Memlekettik qyzmet isteri agenttigi memlekettik qyzmetshilerdiń senimgerlik basqarýǵa berilgen múlikten kiris alý quqyǵyn beretin zańǵa engizilgen normany túsindirdi.
— Parlament vedomstvolyq baǵynysty uıymdar basshylarynyń — memlekettik mekemeler men kásiporyndar (mektep, aýrýhana jáne basqa da uıymdar) dırektorlary men jetekshileriniń kásipkerlikpen aınalysýyna qoıylǵan tyıymdy alyp tastaıtyn Zań qabyldady. Naqtylap aıtqanda, kásipkerlik qyzmet olardyń laýazymdyq mindetterin oryndaýǵa kedergi keltirmeýi, sol maqsatta qyzmettik múlikti paıdalanbaýy nemese múddeler qaqtyǵysyn týdyrmaýy kerek. Qabyldanǵan ózgeristerdiń túp negizi kommýnaldyq memlekettik mekeme dırektory azamat A.Belgibaevtyń ótinishi boıynsha shyǵarylǵan Konstıtýtsııalyq sottyń atalǵan tyıymdy Konstıtýtsııaǵa qaıshy dep tanýy týraly sheshimi boldy. Sonymen qatar, Konstıtýtsııalyq sot kásipkerlik qyzmetke qoıylatyn shekteýler laýazymdyq mindetterdiń sıpatyna baılanysty jáne saralanǵan bolýy kerek ekenin atap ótti, — dep túsindiredi agenttikten.
Vedomstvolyq uıym basshylary burynǵydaı sybaılas jemqorlyq quqyq buzýshylyq sýbektisine jatady jáne memlekettik qyzmetshilermen teń dárejede sybaılas jemqorlyqqa qarsy organnyń nazarynda bolady.
— Atalǵan basshylarǵa sybaılas jemqorlyqqa qarsy shekteýler qoldanylady. Atap aıtqanda, olarǵa qarjylyq baqylaý sharalary, múddeler qaqtyǵysynyń aldyn alý jónindegi talaptar, sondaı-aq týystarymen birlesip jumys isteýge tyıym salý normalary saqtalady. Tıisinshe, vedomstvolyq uıymdar basshylary kásipkerlik qyzmetti júzege asyrý barysynda belgilengen shekteýlerdi, onyń ishinde qyzmettik múlikti paıdalaný nemese múddeler qaqtyǵysy kezinde qyzmet júrgizý talaptaryn buzǵan jaǵdaıda, «Sybaılas jemqorlyqqa qarsy is-qımyl týraly» Zańǵa sáıkes sybaılas jemqorlyqqa qarsy shekteýlerdi saqtamaǵany úshin qyzmetten bosatý túrindegi jaýapkershilik kózdelgen, — dedi vedomstvodan.
Aıta keteıik, Senat «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Konstıtýtsııalyq sotynyń sheshimderin oryndaý jáne zańsyz ıemdenilgen aktıvterdi memleketke qaıtarý máseleleri boıynsha ózgerister men tolyqtyrýlar engizý týraly» Zańdy eki oqylymda qarap, maquldady. Osy qujat aıasynda «Sybaılas jemqorlyqqa qarsy is-qımyl týraly» Zańǵa memlekettik qyzmetshilerdiń senimgerlik basqarýǵa berilgen múlikten kiris alý quqyǵyn kózdeıtin norma engiziledi.