Memkirister komıteti kórsetken 18,4 mln qyzmettiń 6% ǵana qaǵaz túrinde bolǵan

ASTANA. QazAqparat - QR memlekettik kirister organdary qyzmetteriniń 94% elektrondy formatta kórsetiledi. Bul týraly QazAqparat QR Qarjy mınıstrligi Memlekettik kirister komıtetine silteme jasap habarlaıdy.

«Memlekettik qyzmetterdi avtomattandyrýdaǵy maqsat - klıenttiń qazynalyq (fıskaldyq) organnyń qyzmetkerimen baılanysýyn barynsha azaıtý. Bul ýaqyt pen qarjy shyǵynyn únemdeıdi. Búginniń ózinde memlekettik kirister organdary kórsetetin 44 qyzmettiń 30-y elektrondy formatqa kóshken, al qyzmettiń 26 túrin «Azamattarǵa arnalǵan úkimet» Memlekettik korporatsııasy arqyly alý múmkindigi qarastyryldy. Elektrondy formatta kórsetilgen qyzmetterdiń úlesi 94% jetti. 2018 jyldyń 10 aıynda memlekettik kirister organdary kórsetken 18,4 mln qyzmettiń 17,3 mıllıony, ıaǵnı 94% elektrondy, al 1,1 mıllıony (6%) qaǵaz túrinde boldy», - delingen habarlamada.

Komıtettiń derekterine qaraǵanda, eksport-ımport operatsııalaryn júzege asyrý boıynsha memlekettik qyzmetter kórsetýdi avtomattandyrý men ońtaılandyrý aıasynda ASTANA-1 jáne E-Tereze aqparattyq júıeleri engizilip jatyr. Bul qyzmetter sapasyn jaqsartýǵa yqpalyn tıgizip otyr. Qazirdiń ózinde eksport-ımport deklaratsııalarynyń 65% laýazymdy tulǵalardyń qatysýynsyz, avtomatty túrde shyǵarylyp, kedendik tazartýǵa ortasha nebári 1 mınýt jumsalyp júr.

Budan tys, Memlekettik kirister komıteti jurtshylyqpen keri baılanysty damytyp keledi. Tipti, Qarjy mınıstrliginde halyqqa esep beretin qoǵamdyq keńes qurylyp, Komıtettiń qyzmetine qatysty máseleler qyzý talqyǵa salynyp jatyr. Qoǵamdyq keńes 2018 jyly jurtshylyq ókilderi jáne «Atameken» UKP qatysýymen 5 otyrys ótkizdi.

Komıtet salyq mádenıet kóterý ári nasıhattaý maqsatynda jurtshylyqpen baılanysýdyń san amalyn paıdalanady. Komıtet qyzmetinen BAQ arqyly úzbeı qulaǵdar etýdiń nátıjesinde, jyldyq baǵalaý qorytyndylary boıynsha aqparattardyń mazmuny men qoljetimdiligine 5 baldan 4,7 ball qoıyldy.