Memhatshy Joldaýdan týyndaıtyn negizgi murattardy aıqyndap berdi
«Pandemııaden keıingi kezeńde qazaq qoǵamynyń aldyna eńbek muraty shyǵýy tıis. Bul - bizdiń birinshi muratymyz. Álemdegi ozyq memleketterdiń qaı-qaısysy da damýdyń bıik shyńyna tek eńbek arqyly jetkenin esten shyǵarmaǵan abzal. Sondyqtan biz irgeli el bolamyz desek, eńbeksiz eshqandaı tabysqa jete almaıtynymyzdy este ustaǵanymyz jón.
Ekinshi murat. Álem jurtshylyǵyn ábigerge salǵan indet kezinde biz neniń qajet, neniń qajet emes ekenin tolyq túsingen tárizdimiz. Osy oraıda qalyń eldiń aldyna densaýlyq muraty shyǵady. Ár azamat shıraq ta sergek bolýdyń barlyq amaldaryn jasaýy kerek. Bul turǵyda irgedegi Qytaı eliniń jappaı densaýlyq saqtaý baǵytyndaǵy is-qımyl, kúndelikti jattyǵý amaldarynan úırený artyq etpeıdi.
Úshinshi murat – bilim muraty. Bilimdi bolý úshin kóp oqý kerek. Osy rette Qazaqstanda kitap kýltin jasaý isi óte mańyzdy. Álemniń ozyq elderinde kitap oqý memlekettik deńgeıdegi mártebeli mindet sanalady. Ókinishke qaraı, qazir bizdiń jastarymyz, ásirese óskeleń urpaq tek smartfon paraqshalaryn qyzyqtaýdan aryǵa bara almaı otyr. Mundaı ýaqytty «bosqa óltirý» amaldarynan tezirek arylý kerek», - dedi ol.
Memlekettik hatshy zııaly qaýym ókilderinen jastardyń boıyna eńbek, densaýlyq, bilim murattaryn sińirý, dúnıejúzilik pandemııa tusynda jáne odan keıingi kezeńde halyqtyń eńbekke degen qulshynysyn arttyrý, salaýatty ómir saltyn ustaný, kitap oqýǵa yntalandyrýdyń qazirgi zamanǵy tásilderi men tehnologııalaryn qalyptastyrý boıynsha usynystar engizýlerin surady.
«Sizderden jınaqtalǵan usynystardy biz «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysynyń kún tártibine, baıandamasyna jáne hattama jobasyna engizemiz. El damýyna qatysty kez kelgen utymdy usynys pen ornyqty oı jerde qalmaı, mindetti túrde júzege asatynyn aıryqsha atap ótkim keledi», - dedi Q.Kósherbaev.
