Memhatshy: Qazaqstan BUU Qaýipsizdik Keńesiniń turaqty emes múshesi retinde ózekti máselelerdi sheshýde aıtarlyqtaı úles qosýǵa daıar (FOTO)

ASTANA. QazAqparat - Búgin Aqordada Qazaqstan Respýblıkasynyń Memlekettik hatshysy Gúlshara Ábdiqalyqova jańadan taǵaıyndalǵan BUU-nyń Qazaqstandaǵy Rezıdent-úılestirýshi - BUU Damý baǵdarlamasynyń QR-daǵy Turaqty ókili Norımasa Shımomýramen kezdesti.

Qazaqstan men BUU arasyndaǵy yntymaqtastyq qarqyndy damyp kele jatqandyǵyna toqtalǵan Memlekettik hatshy: «2015 jyly BUU Bas  hatshysy Pan Gı Mýnnyń Qazaqstanǵa saparyn joǵary baǵalaımyz. Bul sapar mazmundy bolǵanyn atap ótken jón. QR Prezıdenti Nursultan Nazarbaev BUU tarapymen ózara qatynastarǵa erekshe nazar aýdaryp otyrǵandyǵyn jaqsy bilesizder», - dedi.

Sonymen qatar, G. Ábdiqalyqova bıylǵy maýsymda Qazaqstan BUU Qaýipsizdik Keńesiniń turaqty emes múshesi retinde saılanǵan jaǵdaıda adamzat aldyndaǵy máselelerdi sheshýde aıtarlyqtaı úles qosýǵa, sonymen qatar Ortalyq Azııa óńiriniń máselelerine halyqaralyq qaýymdastyqtyń nazaryn belsendi tartýǵa daıyn ekenin aıtty.

Memlekettik hatshy «Qazaqstan-2050» strategııasynyń, «Nurly jol - bolashaqqa bastar jol» memlekettik baǵdarlamasy jáne Bes ınstıtýtsıonaldy reformalardyń negizgi baǵyttary BUU Bas hatshysynyń Besjyldyq is-qımyl baǵdarlamasynyń basymdyqtarymen, Myńjyldyq Damý maqsattarymen jáne BUU-nyń Turaqty Damý maqsattarymen úılesimdi ekendigin jetkizdi.

Kezdesý sońynda G. Ábdiqalyqova Turaqty ókil Norımasa Shımomýraǵa Qazaqstan men BUU Damý baǵdarlamasy arasyndaǵy dıalogty jáne ózara túsinistikti nyǵaıtýdaǵy jumystaryna tabys tiledi.