Memhatshy Abaı atyndaǵy QazUPÝ-dyń 90 jyldyq mereıtoıyna qatysty

ALMATY. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Abaı atyndaǵy Qazaq ulttyq pedagogıkalyq ýnıversıtetiniń 90 jyldyǵyna arnalǵan saltanatty is-sharaǵa qatysty, dep habarlaıdy QazAqparat Aqordanyń resmı saıtyna silteme jasap.  

Jıynǵa Parlament depýtattary, bilim jáne ǵylym mınıstrliginiń, dıplomatııalyq mıssııalardyń, Ulttyq ǵylym akademııasynyń ókilderi, elimizdiń jetekshi ýnıversıtetteriniń rektorlary, otandyq belgili ǵalymdar, ýnıversıtettiń oqytýshy-professorlar quramy men stýdentteri, sondaı-aq 200-den astam sheteldik qonaqtar qatysty.

Memlekettik hatshy saltanatty jınalysqa qatysýshylarǵa Qazaqstan Prezıdenti Nursultan Nazarbaevtyń quttyqtaýyn oqyp berdi. Onda: «Abaı atyndaǵy Qazaq ulttyq pedagogıkalyq ýnıversıteti - otandyq joǵary bilim berý júıesiniń qara shańyraǵy. Ýnıversıtet búginde tarıhy 1928 jyly elimizdegi jalǵyz pedagogıkalyq fakýltettiń ashylýynan bastaý alatyn jetekshi oqý ornyna aınalyp otyr. Onyń qalyptasýyna belgili ult qaıratkerleri - Ahmet Baıtursynov, Temirbek Júrgenov, Halel Dosmuhamedov, Sáken Seıfýllın jáne basqa da kóptegen kórnekti tulǵalar zor úles qosty. Ýnıversıtette Qazaqstannyń qaryshty damýyna qajetti mamandar daıarlaıtyn 14 akademık, 155 ǵylym doktory jáne 380 ǵylym kandıdaty sabaq beredi» dep atap ótilgen.

Abaı atyndaǵy Qazaq ulttyq pedagogıkalyq ýnıversıteti iri ǵylym, bilim ortalyǵy ári elimizdiń pedagogıkalyq joǵary oqý oryndary arasynda kópshilik moıyndaǵan kóshbasshy bolyp sanalady. Bul ýnıversıtet 2018 jyly Eýropa men Ortalyq Azııanyń 30 eliniń  úzdik 200 ýnıversıtetiniń ishinde 86-oryndy ıelendi. Búginde oqý orny álemniń 25 memleketiniń 130 ýnıversıtetimen ǵylymı jáne akademııalyq baılanys ornatqan.

Saltanatty is-shara sońynda qazaqstandyq estrada juldyzdarynyń qatysýymen merekelik kontsert ótti.