Memfýnktsııalardy básekeles ortaǵa berý erejeleri júıesizdikke jol bermeıdi - Nyǵmatýlın
ASTANA. QazAqparat - Búgin Májilis spıkeri Nurlan Nyǵmatýlınniń tóraǵalyǵymen ótken jalpy otyrysta «Qazaqstan Respýblıkasynyń keıbir zańnamalyq aktilerine memlekettik fýnktsııalardy básekeles ortaǵa berý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasy azamattardyń ózin-ózi retteýdi damytý arqyly sheshimder qabyldaý protsesine qatysý múmkindikterin keńeıtýge, memleketke tán emes fýnktsııalardy básekeles ortaǵa jáne ózin-ózi retteıtin uıymdarǵa berýge baǵyttalǵan.
Zań jobasy «Ult jospary - 100 naqty qadamnyń» 97-qadamyn iske asyrý maqsatyn kózdeıdi.
«Biz Elbasynyń Ult josparyn oryndaý jolynda taǵy bir mańyzdy qadam jasadyq deýge bolady. Prezıdentimiz aıtqandaı, elimizdiń damýy - birqatar memlekettik fýnktsııalardy básekeles ortaǵa berýdi talap etedi. Onyń basty maqsaty - memlekettik organdardyń ýaqytyn únemdep, jumys sapasyn kúsheıtý. Osy oraıda, búgin maquldanǵan zań jobasynyń orny da erekshe, róli de óte zor», - dedi N.Nyǵmatýlın.
Májilis tóraǵasy atap ótkendeı, eń bastysy - zań jobasy memlekettik fýnktsııalardy básekeles ortaǵa berýdiń naqty belgilengen erejelerin bekitedi. Nátıjesinde bul máselede búginge deıin oryn alyp kelgen júıesizdikke, retsizdikke jol berilmeıdi.
Aıta keteıik, osy zań jobasy arqyly 3 kodekske jáne 4 zańǵa ózgerister men tolyqtyrýlar engiziledi dep kútilýde.
