Membranozdy nefropatııa aýrýyna kóbine er adamdar shaldyǵady - nefrolog
ALMATY. QazAqparat - Membranozdy nefropatııany emdeýde nege mán bergen jón. Bul týraly nefrolog (búırek) dáriger, kardıologııa jáne ishki aýrýlar ǴZI terapııa bólimshesiniń meńgerýshisi Leıla Mamedova aıtyp berdi, dep habarlaıdy QazAqparat tilshisi.
Membranozdy nefropatııa – búırek kapıllıarlarynyń qabyrǵalarynda ımmýndyq keshenderdiń shógip qalýynan týyndaıtyn búırek shýmaqshasynyń zaqymdanýy. Bul bazaldy membranalar men tamyr qabyrǵalary shýmaqshasynyń qalyńdaýyna jáne qabattasýyna ákeledi. Membranozdyq nefropatııanyń negizgi klınıkalyq kórinisinde nefrotıkalyq sındrom - búkil deneniń isinýi, neseptegi aqýyzdyń jáne qandaǵy holesterınniń joǵary bolýy baıqalady.
Nefrolog dáriger, kardıologııa jáne ishki aýrýlar ǴZI terapııa bólimshesiniń meńgerýshisi Leıla Mamedovanyń aıtýynsha, búırek shýmaqshasynyń zaqymdanýy búırektiń durys jumys isteýine kedergi jasap, onyń jumysynyń nasharlaýyna ákeledi. Sonymen qatar, zaqymdanǵan búırek shýmaqshalary aǵzanyń tamyrlary men tinderi arasyndaǵy jáne qan uıýynyń teńgerimin saqtaý sekildi qyzmetterdi oryndaıtyn qandaǵy aqýyzdardy nesepke ótkize bastaıdy. Aqýyzdar zaqymdanǵan shýmaqshalar arqyly ótip, neseppen shaıylyp ketedi, aǵza aqýyzdarmen qamtamasyz etiletin qyzmetterin jartylaı joǵaltady.
«Aǵzanyń tamyrlary men tinderi arasyndaǵy suıyq teńgeriminiń buzylýy denede, onyń ishinde ókpede, baýyrda, búırekte jáne aǵzanyń tabıǵı qýystarynda isikterdiń paıda bolýyna ákeledi. Qannyń uıý júıesindegi dısbalans búırek tamyrlarynyń trombozyna jáne ókpe arterııalarynyń tromboembolııasyna ákeledi», - deıdi Leıla Mamedova.
Sonymen qatar, dáriger 75% jaǵdaıda membranozdyq nefropatııa bastapqy, al 25% jaǵdaıda – qaıtalama bolatynyn málim etti. Membranozdyq nefropatııa kóbine er adamdarda týyndaıdy, áıelder bul aýrýǵa sırek shaldyǵady. Aýrý jıiligi 30-dan 60 jasqa deıingi adamdarda kezdesedi.
Membranozdyq nefropatııanyń paıda bolýynyń bastapqy sebebi kóp jyldar boıy belgisiz boldy. Biraq, ǵylymı zertteýlerdiń barysynda ıdıopatııalyq membranozdyq nefropatııa kezinde shýmaqshalardyń belgili bir qurylymdyq elementterine, onyń ishinde trombotsıtterdiń jandaný faktory – A2 fosfolıpazdar retseptorlaryna aýtoımýndyq agressııanyń bolatyndyǵy anyqtaldy. Nátıjesinde ımmýnıtet óz aǵzasynyń tinderin zaqymdap, shýmaqshalardyń qurylymdyq tutastyǵynyń buzylýyna ákeledi.
«Membranozdyq nefropatııa sonymen qatar bettiń, aıaqtyń, ish jáne ókpeqap qýysy, keıde búkil deneniń isinýi, arterııalyq qan qysymynyń joǵarylaýy; tábettiń tómendeýi; neseptiń táýliktegi mólsheriniń ózgerýi; bastyń aýrýy, bas aınalý, loqsý; jalpy álsizdik jáne sharshaý sekildi kórinister beredi. Іsik paıda bolý jáne nesep taldaýynda ózgerister (aqýyzdyń bolýy) anyqtalǵan jaǵdaıda shuǵyl túrde nefrolog dárigerge qaralǵan durys», - deıdi dáriger.
Sonymen qatar, ol atalǵan aýrýdy emdeýde ýaqyt jáne patsıentterdiń dáriger usynymyn buljytpaı oryndaýy mańyzdy ekenin eskertti. Eger membranozdyq nefropatııa erte deńgeıinde anyqtalyp, naýqastar qajetti emdi der kezinde qabyldasa, onda búırek shýmaqshalarynda qaıtymsyz ózgeristerdiń damýynyń toqtatylýy múmkin bolady. Qandaı da bir sebeptermen ýaqyt ótip ketse jáne patsıentter em qabyldamasa, onda shýmaqshalar óziniń fýnktsııasyn joǵaltýy múmkin. Al búırektiń óziniń negizgi fýnktsııalaryn joǵaltýy ómir súrý sapasynyń nasharlaýyna ákeledi. Bul naýqastar budan ári búırek tolyqtyrǵysh emine: gemodıalız jáne búırek transplantatsııasyna muqtaj bolyp qalady.
