Membasqarý akademııasy keleshekte búkilálemdik bilim berý baǵdarlamasy negizinde oqyta bastaıdy
ASTANA. 26 sáýir. QazAqparat - Memlekettik basqarý akademııasy bilim berý baǵdarlamasyn halyqaralyq standarttarǵa negizdep, akademııada bilim alýshylar bolashaqta búkilálemdik bilim berý baǵdarlamasy negizinde oqytylmaq.
Bul týraly búgin Memleket basshysynyń Joldaýyna baılanysty ǵalymdar, doktoranttar jáne magıstranttar arasynda ótip jatqan ǵylymı-tájirıbelik konferentsııa barysynda Memlekettik basqarý akademııasynyń rektory Bolatbek Ábdirásilov aıtty.
Onyń sózinshe, Memlekettik basqarý akademııasy úlken jańǵyrtýlardy bastan ótkerip otyr. Bul rette atalmysh bilim ordasynda bilim berý isiniń mazmuny da qurylymy da ózgerip otyrǵandyǵyn aıta ketý kerek. «Biz qazir bul baǵyttaǵy jumystardy aıaqtaýǵa taıaýmyz. Álemdegi barlyq basqarý mektepteriniń tájirıbelerin zerttedik. Olardyń arasynda eń úzdik degen jáne ózimiz úshin eń yńǵaıly degenin tańdap aldyq. Qazir ózimizdiń bilim berý baǵdarlamalarymyzdyń úlgisin daıyndaýdy aıaqtaýǵa taıaýmyz. Bul árıne úlken jumys jáne ol bizden úlken kúsh-jigerdi qajet etedi. Men barlyǵymyz birlesip, osy mindetti talapqa saı atqaramyz degen oıdamyn»,-dedi akademııa rektory.
