Membaǵdarlamalardy júzege asyrý kezinde 16 jemqorlyq qylmys tirkeldi- Aqmola oblysy
Bul týraly QR Sybaılas jemqorlyqqa qarsy is-qımyl agenttigi Aqmola oblysy boıynsha departamentiniń basshysy Murat Tóleýbaevtyń 2019 jylǵy jumys qorytyndysy boıynsha eseptik kezdesýinde aıtyldy, dep habarlaıdy QazAqparat tilshisi vedomstvonyń baspasóz qyzmetine silteme jasap.
Kezdesýde Murat Tóleýbaev sybaılas jemqorlyqtyń aldyn alý salasynda júzege asyrylǵan is-sharalar jáne departamenttiń jedel-tergeý bólimsheleriniń esepti kezeńdegi atqarǵan jumystary týraly aıtyp berdi.
Atap aıtqanda, aqparattyq-túsindirý sıpatyndaǵy 3088 is-shara ótkizilip, oǵan memlekettik qyzmetkerler men jurtshylyq qatysty. Sybaılas jemqorlyqqa qarsy áreket etýge baǵyttalǵan jobalar jumys isteıdi: «Aqmola - adaldyq alańy», «Bıznes pen ınvestorlardy qorǵaý», «Sanaly urpaq» tárizdi jobalar. Turaqty negizde sybaılas jemqorlyq táýekelderine taldaý, sybaılas jemqorlyqqa qarsy monıtorıng júrgiziledi.
Aıta ketý kerek, Sybaılas jemqorlyqqa qarsy qyzmettiń barlyq bastamalary ádildik, senim jáne parasattylyq sııaqty qundylyqtar prızmasy arqyly iske asyrylady.
Qylmystyq tájirıbege keler bolsaq, oblystyń Sybaılas jemqorlyqqa qarsy qyzmeti 166 qylmystyq quqyq buzýshylyqty tirkedi, onyń ishinde 142 - si sybaılas jemqorlyq faktileri boıynsha. Qylmystyń negizgi bóligin urlyq faktileri quraıdy, olardyń sany - 82, jáne paraqorlyq faktileri, olardyń sany - 65. Sybaılas jemqorlyq qylmystaryn jasaǵany úshin 99 adam jaýapqa tartyldy, júıeli sybaılas jemqorlyqtyń 7 faktisi anyqtaldy, memlekettik organdar tarapynan shaǵyn jáne orta bıznes qyzmetine aralasýdyń 20 faktisi anyqtaldy.
Memlekettik baǵdarlamalardy júzege asyrý aıasynda 16 sybaılas jemqorlyq qylmysy tirkeldi. 60-tan astam turmystyq sybaılas jemqorlyq faktileri anyqtaldy. Sondaı - aq, turmystyq sybaılas jemqorlyqty joıý, sybaılas jemqorlyqqa qarsy mádenıetti qalyptastyrý jáne memlekettiń sybaılas jemqorlyqqa qarsy saıasatyn iske asyrý barysy boıynsha qabyldanǵan sharalar týraly «Aqmola-adaldyq alańy» jobalyq keńsesiniń basshysy Samıra Taıtenova men óńirlik Arnaıy monıtorıngtik toptyń tóraǵasy Vladıslav Shýl baıandama jasady.
Esep berý kezdesýin qorytyndylaı kele, óńirlik sybaılas jemqorlyqqa qarsy vedomstvonyń basshysy Departament qoǵammen tyǵyz qarym-qatynasta óńirdegi sybaılas jemqorlyqty azaıtý boıynsha barlyq qajetti sharalardy qolǵa alatyndyǵyn aıtty.
«Árkim sybaılas jemqorlyqqa nóldik tózbeýshilikti qalyptastyrý boıynsha belsendi azamattyq ustanymdy tanytýǵa shaqyramyn. Tek birlesken kúsh - jigermen ǵana biz jemqorlyqty jalpyǵa ortaq órkendeýimizdiń ıgiligi úshin joıa alamyz», - dep atap ótti Murat Tóleýbaev.