Membaǵdarlamalardy júzege asyrý barysynda qalada 20 myńnan astam jumys orny quryldy - Baýyrjan Baıbek
ALMATY. QazAqparat - Búgin almatylyqtar men qala qonaqtaryn Konstıtýtsııa kúnimen quttyqtaǵan shahar basshysy Baýyrjan Baıbek memlekettik baǵdarlamalardy júzege asyrý barysynda ǵana qalada 20 myńnan astam jumys orny qurylǵanyn aıtty, dep habarlaıdy QazAqparat tilshisi.
«Elbasynyń tapsyrmasy boıynsha qabyldanǵan memlekettik baǵdarlamalar aıasynda biz qalada jańa turǵyn úıler salýdamyz, ınfraqurylym men kommýnıkatsııany jańǵyrtýdamyz, jańa jumys oryndaryn ashýdamyz. Mysaly, «Nurly Jer» baǵdarlamasy boıynsha 124 úı salý úshin 73 mlrd. teńge bólindi. Bıylǵy jyly 85 úıdiń qurylysy aıaqtalady, onyń 40%-y qalaǵa qosylǵan Alataý aýdanynda. 5 myń jumys orny paıda boldy. Jalpy, qoljetimdi baspana kólemi qalada 6,5 ese artty. Bıyl 3 myń otbasy páter aldy, jyl aıaǵyna deıin taǵy da 3,2 myń otbasy jańa qonysqa ıe bolady», - dedi qala ákimi.
Qala basshysy «Nurly Jol» baǵdarlamasy boıynsha 106 km ınjenerlik jeli, mektepterge 2 jańa korpýs, 28 qoljetimdi baspana salynǵanyn, sonyń arqasynda 2,4 myń jumys orny ashylǵanyn jetkizdi.
«Indýstrıaldy-ınnovatsııalyq damý aıasynda quny 36 mlrd. teńge bolatyn 33 joba iske asty. Jyl aıaǵyna deıin taǵy da qosymsha quny 59 mlrd. teńge bolatyn 22 joba qolǵa alynyp, 5 myń jumys orny ashylady. Bıznestiń Jol kartasy boıynsha 687 joba oryndalyp, 4 myńnan astam jumys orny ashylady», - dedi ákim.
Aıta keteıik, búgin Abaı atyndaǵy Memlekettik akademııalyq opera jáne balet teatrynda Qazaqstan Respýblıkasynyń Konstıtýtsııa kúnine arnalǵan saltanatty jıyn ótip, Almaty ákimi Baýyrjan Baıbek almatylyqtardy Konstıtýtsııa kúnimen quttyqtady.
