Membaǵdarlamalarda taýar jetkizý men qyzmetterdi atqarýda otandyq kásiporyndarǵa basymdyq beriledi
Bul týraly búgin Úkimet otyrysynda QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.
«Qazirgi ýaqytta syrtqy ekonomıkalyq jaǵdaıdyń ózgerýin eskere otyryp, ónerkásiptegi ahýaldy turaqtandyrý maqsatynda Úkimet jedel sharalardy qolǵa aldy. Bul sharalar jumys oryndaryn saqtap qalýdy, ishki naryqqa baǵyttalǵan jańa óndiristerdi damytýdy, sonymen qatar qazirgi saýda aǵymdaryn saqtaý úshin balamaly ótkizý naryqtaryn izdeýdi kózdeıdi. «Nurly jol» jáne «Nurly jer» memlekettik baǵdarlamalaryn júzege asyrý aıasynda taýarlardy jetkizý jumystary men qyzmetterdi atqarýda otandyq kásiporyndarǵa basymdyq beriledi», - dedi Qaıyrbek Óskenbaev.
Onyń atap ótýinshe, bul shara qurylys materıaldary, metallýrgııa, hımııa jáne basqa aralas sektorlardaǵy kásiporyndardyń júktemesin qamtamasyz etýge múmkindik beredi.
«Naqtyraq aıtsaq, 2020 jyly memlekettik baǵdarlama aıasynda 15 mıllıon sharshy metr turǵyn úıdi paıdalanýǵa berý, 2,6 myń shaqyrym respýblıkalyq, 4,3 myń shaqyrym jergilikti mańyzy bar joldardy salý jáne jóndeý kózdelgen. Osy is-sharalardy iske asyrý esebinen otandyq jetkizilimderdiń úlesin 95 paıyzǵa deıin ulǵaıtý josparlanǵan», - dedi birinshi vıtse-mınıstr.
