Membaǵdarlama boıynsha sýbsıdııa alǵan jobalar sany jaǵynan ShQO kósh bastady
ÓSKEMEN. QazAqparat - Qazaqstannyń shyǵys óńiri respýblıkada memlekettik baǵdarlama boıynsha sýbsıdııa alǵan jobalar sany jaǵynan kósh bastady. Bul týraly ákimdiktiń otyrysynda ShQO kásipkerlik jáne ındýstrııaldyq-ınnovatsııalyq damý basqarmasynyń basshysy Maqsat Músápirbekov málimdedi, dep habarlaıdy «QazAqparat» HAA tilshisi.
Shyǵys Qazaqstanda úsh baǵyt boıynsha bıznesti qoldaý jáne damytýdyń «Bıznestiń jol kartasy - 2020» biryńǵaı baǵdarlamasy belsendi iske asyrylýda. Memlekettik baǵdarlama óńirlik kásipkerliktiń turaqty ári birizdilikpen damýyn qamtamasyz etýge, sondaı-aq jańa turaqty jumys oryndaryn ashýǵa baǵyttalǵan.
«Baǵdarlama aıasynda kásipkerlikti qarjylaı qoldaý mehanızmderiniń biri nesıeler boıynsha syıaqy mólsherlemesiniń bólikterine sýbsıdııalar berý bolyp tabylady. 2017 jyldyń basynan beri sýbsıdııa alǵan baǵdarlamalardyń sany byltyrǵy kórsetkishterge qaraǵanda 30%-ke artty», - dedi M. Músápirbekov.
Onyń sózine qaraǵanda, 2010 jyldan beri oblysta nesıelerdiń jalpy quny 124,9 mlrd teńge bolatyn 887 joba sýbsıdııalanǵan. Aǵymdaǵy jyldyń 11 aıynda jalpy 14,7 mlrd teńgege 191 jobaǵa sýbsıdııa belgilenip, sonyń 1,6 mlrd teńgesi tólengen. Al 2016 jyldyń osy kezeńinde jalpy 15,1 mlrd teńgeniń 147 jobasyna sýbsıdııa belgilenip, 1,5 mlrd tólengen bolatyn.
Sýbsıdııalaý óńirdiń barlyq aýdandary men qalalaryn qamtydy, degenmen onyń úlken bóligi ortalyq qalalar Óskemen (356 joba) men Semeıdiń (196) úlesine týra keledi.
Basqarma basshysy salalarǵa shaqqanda sýbsıbııa bólingen jobalardyń basym kópshiligi óńdeý ónerkásibine tıesili ekenin tilge tıek etti. Budan tys, kólik jáne qoıma, saýda, aýyl, orman, balyq sharýashylyqtary, páter jáne tamaqtaný qyzmetterin kórsetý, densaýlyq saqtaý, áleýmettik qyzmetter sekildi salalar da óńirde jandanyp keledi.
