Mels Eleýsizov: Ekologııa mınıstrligin qaıtadan qurý kerek
ASTANA. QazAqparat - Búgin Parlament Májilisinde «Parıj kelisimin ratıfıkatsııalaý týraly» zań jobasyn talqylaý kezinde «Tabıǵat» ekologııalyq odaǵynyń basshysy Mels Eleýsizov Qazaqstanda ekologııa mınıstrligin qaıta qurýdy usyndy.
«Klımattyq, ekologııalyq máseleler ózekti ekeni belgili. Negizi ekologııa mınıstrligi bolǵany durys. Buǵan deıin bizde osyndaı ókiletti vedomstvo bolǵan edi. Qazaqstanda qorshaǵan ortany qorǵaý mınıstrligi qajet degen tujyrymdamyn. Sondyqtan atalǵan vedomstvony qaıta qurý turǵysynda depýtattar bul taqyrypty kóteredi dep paıymdaımyn»,-dedi ol.
Sonymen qatar M. Eleýsizov jahandyq klımattyq jaǵdaıǵa toqtala kele, búginde ǵalamshardaǵy temperatýra jarty gradýsqa kóterilgenin, muzdyqtardyń 44 paıyzy erip ketkenin jetkizdi.
«Adamzat aldynda sý problemasy týyndaýda. Bizdiń de muzdyqtar erip jatyr. Han Táńirine arnaıy ekspedıtsııaǵa qatysqan bolatynmyn jáne ondaǵy úlken muzdyqtardyń erýiniń kórinisi úreı týdyrady. Nebári jarty gradýsqa temperatýra ózgerse de, muzdyqtardyń erý úrdisi jyldamdaı tústi»,-dedi ol.
Aıta keteıik, Parıj kelisimi 2015 jylǵy jeltoqsanda BUU-nyń Klımattyń ózgerýi jónindegi negizdemelik konventsııasy taraptarynyń 21-shi konferentsııasynda Frantsııada qabyldandy. Bul kelisim jahandyq ortasha temperatýranyń joǵarylaýyna jol bermeý baǵytynda jumys isteý, ıaǵnı, temperatýranyń ortasha ósimin 2 gradýstan asyrmaýdy, jasyl ekonomıkaǵa qarjy kózderin kóptep tartý sekildi negizgi máselelerdi qamtyp otyr.
