Melonı úkimeti Italııada bılik basynda bolý merzimi boıynsha rekord ornatty
ASTANA. KAZINFORM – 4 qyrkúıekte Djordja Melonı basqaratyn Italııa mınıstrler kabınetiniń úzdiksiz jumys istegenine 1 413 kún tolyp, Sılvıo Berlýskonıdiń ekinshi úkimetiniń qyzmet etý merziminen asyp tústi. Bul týraly Kazinform agenttiginiń EO-daǵy menshikti tilshisi habarlaıdy.
ANSA agenttiginiń málimetinshe, Djordja Melonı úkimeti 2022 jylǵy 22 qazanda ant qabyldaǵan. Buǵan deıingi rekord Sılvıo Berlýskonıdiń ekinshi úkimetine tıesili edi. Ol 2001 jylǵy maýsymnan 2005 jylǵy sáýirge deıin, ıaǵnı 1 412 kún bılik etti.
Djordja Melonı Italııa tarıhynda Mınıstrler keńesiniń tóraǵasy qyzmetine taǵaıyndalǵan alǵashqy áıel atandy. Onyń úkimeti «Italııa baýyrlary», «Alǵa, Italııa» jáne «Lıga» partııalarynan quralǵan koalıtsııaǵa súıenedi.
Bul rekord bir úkimet quramynyń úzdiksiz qyzmet etý merzimine qatysty. Al Premer-mınıstr retinde ótkizgen jalpy ýaqyt turǵysynan alǵanda, rekord áli de úkimetti tórt ret basqarǵan Sılvıo Berlýskonıge tıesili.
Qazirgi parlamenttiń ókilettik merzimi 2027 jyly aıaqtalady. Italıa baspasózinde «mınıstrler kabıneti óz qyzmetiniń merzimi aıaqtalǵansha jumys isteı me, álde merziminen buryn jańa úkimet saılana ma» degen másele talqylanyp jatyr.
Bul rette Dj. Melonı bıliktegi koalıtsııanyń qaıta saılanǵanyn qalaıtyny anyq. Sebebi, eldiń keıbir basylymdarynyń jazýynsha, ol el prezıdenttigine umtylýy múmkin jáne osy maqsatyna jetýi úshin parlamentte ózin qoldaıtyn kópshiliktiń bolýy asa mańyzdy.
Óz kezeginde úkimet geopoetıkalyq shıelenis, energııa tasymaldaýshylar baǵasynyń ósýi jáne shekteýli bıýdjet resýrstary jaǵdaıynda atqarylǵan jumys qorytyndylaryn qanaǵattanarlyq dep baǵalaıdy.
Alaıda Italııa oppozıtsııasy saılaýaldy ýádelerdiń birqatary oryndalmaǵanyn, al josparlanǵan reformalardyń júzege aspaǵanyn alǵa tartady. Sonymen qatar úkimet sot reformasy jónindegi referendýmda da jeńildi.
«Italııa baýyrlary» partııasynyń reıtıngi 30 paıyz shamasynda saqtalsa, onyń odaqtastarynyń kórsetkishi 9-10 paıyz deńgeıinde. Solshyl-ortalyq kúshterdiń jıyntyq kórsetkishi bıleýshi koalıtsııamen shamalas bolǵanymen, ishki jáne syrtqy saıasattaǵy qaıshylyqtarǵa baılanysty olardyń birtutas alıans qurý máselesi ázirge ashyq másele kúıinde qalyp otyr.
Sarapshylardyń pikirinshe, kúz aılarynda Italııada saılaýaldy naýqan qyza túsedi. Onyń negizgi taqyryptarynda Ýkraınadaǵy daǵdarys pen Eýropany qaıta qarýlandyrý máselesi bar.
Italııa respýblıka bolyp jarııalanǵannan beri elde 31 premer-mınıstr basqaratyn 68 úkimet aýysty.
Aıta keteıik, Djordja Melonı Qazaqstan Prezıdentin eń syndarly kóshbasshylardyń biri dep ataǵan bolatyn.
Aqzat Baqytjanqyzy
