Melıoratsııa jáne sý sharýashylyǵy agenttigin qurý qajet - Q. Aıtahanov
ASTANA. Mamyrdyń 28-i. QazAqparat /Qanat Mámetqazyuly/ - Joǵary bılik qurylymynda Melıoratsııa jáne sý sharýashylyǵy agenttigin qurý qajet. Búgin QR Parlamenti Senatynda «Saýarmaly egin sharýashylyǵy máseleleri boıynsha zańnamany jetildirý jáne Qazaqstanda sýarmaly jerlerdi tıimdi paıdalanýdyń joldary» atty taqyrypta ótken jıynda senator Qýanysh Aıtahanov osyndaı usynys jasady,
dep habarlaıdy QazAqparat.
«Elimizdegi eń úlken sý tutynýshy Aýyl sharýashylyǵy mınıstrligi bolyp tabylady, ol sý qorynyń 60 paıyzyn egin sýarý maqsatynda paıdalanady. Al, sý qoryn paıdalaný jáne qorǵaý salasyndaǵy baqylaý, ruqsat berýge jaýap beretin memlekettik organ Sý komıteti de osy mınıstrliktiń qaramaǵynda. Bul paradoks. Osy turǵydan alǵanda, elimizdegi transshekaralyq ózenderdiń sý resýrstaryn paıdalanýy, halyqaralyq máselelerdi kórshi elderdiń Úkimetiniń músheleri deńgeıinde aralasyp, halyqaralyq jobalardy iske asyrý sekildi sý paıdalanýdyń strategııalyq máselelerin tikeleı Úkimet aldyna qoıyp otyratyn joǵary bılik qurylymynda Melıoratsııa jáne sý sharýashylyǵy agenttigin quratyn jáne onyń vertıkaldy júıesin jasaıtyn ýaqyt jetti ǵoı dep oılaımyz», dedi Q. Aıtahanov.
Sonymen birge, senator elimizdiń ulan-ǵaıyr jerin tıimdi paıdalaný máselesin kótere otyryp, aýyl sharýashylǵy salasynda rentabeldigi joǵary qoı men jylqy sharýashylyǵyn damytý qajettigin de alǵa tartty. Bul úshin de jaıylymdardy tıimdi paıdalaný qajet bolyp otyr. «Jalpy, bundaı máseleler ásirese aýyl sharýashylyǵynyń «altyn qory» sanalatyn sýarmaly jerlerdiń jaǵdaıyn barlap, bolashaǵyn josparlap, kerekti normatıvtik qujattardy ázirlep otyratyn aýyl sharýashylyǵy mınıstrliginde sýarmaly jer sharýashylyǵymen aınalysatyn basqarma nemese bólim bolýy tıistigin kórsetedi», dedi depýtat.
