Meldebekova qashyqtan oqytý jóninde: muǵalimder balalarǵa sabaqty túsindirýge mindetti

ASTANA.KAZINFORM – Oqý-aǵartý birinshi vıtse-mınıstri Maıra Meldebekova mektep oqýshylaryn qashyqtan oqytýǵa qatysty túsinik berdi.

- Balalardy qashyqtan oqytý sheshimi kún raıyna baılanysty qabyldanyp jatady. Atap aıtqanda, sabaq qashyqtan bolsa, keıinnen muǵalim oqýshynyń alǵan bilimin mindetti túrde tekserip otyrýy kerek, - dedi M. Meldebekova Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, onlaın sabaqtyń ártúrli formaty bar. Sabaqty ótkizý formatyna qaraı tapsyrma beriledi. Túrli platformalar arqyly pedagog oqýshylarmen baılanysqa shyǵyp, sabaqty túsindirýge mindetti.

- Máselen, matematıka sabaǵy boıynsha muǵalim berilgen tapsyrmanyń shyǵarý joldaryn balaǵa túsindirýi kerek. Árbir mektepte pedagogıkalyq keńestiń sheshimimen qashyqtan oqytýdan keıin oqýshylardyń bilimin jetildirýge qatysty qosymsha sabaqtardy qarastyrady, - dedi vıtse-mınıstr.

Aıta keteıik, jeltoqsan aıynyń orta kezinde eldiń birneshe óńirinde oqýshylar onlaın oqydy.

17 jeltoqsanda Astanada birinshi aýysymnyń 0-6 synyp oqýshylary qashyqtan oqydy.