Melanshonnyń Frantsııa prezıdenti saılaýynyń ekinshi týryna ótý múmkindigi artty
ASTANA. KAZINFORM – Frantsııadaǵy prezıdent saılaýyna segiz aı qalǵanda «Baǵynbaıtyn Frantsııa» qozǵalysynyń lıderi Jan-Lıýk Melanshonnyń reıtıngi aıtarlyqtaı ósti. Sońǵy saýalnamaǵa sáıkes, ol qarastyrylǵan bes stsenarııdiń úsheýinde ekinshi týrǵa ótýi múmkin, dep habarlaıdy Euronews.
Toluna Harris Interactive kompanııasynyń M6 jáne RTL úshin júrgizgen saýalnamasynda Melanshondy saılaýshylardyń 16-17%-y qoldaýǵa daıyn ekeni anyqtaldy. Sáýirdegi saýalnamada onyń reıtıngi 12% bolǵan.
Osylaısha ol uzaq ýaqyt boıy Marın Le Pennen keıingi ekinshi orynǵa negizgi úmitker sanalǵan Edýar Fılıpppen teńesip keledi. Alaıda Fransýa Olland saılaýǵa qatysqan jaǵdaıda Melanshon Fılıppten 2 paıyzdyq tarmaqqa qalyp qoıýy múmkin.
Melanshon úshin eń tıimdi stsenarıı – qarsylastarynyń birneshe kandıdatqa bólinýi. Máselen, Rafael Glıýksman, Gabrıel Attal, Edýar Fılıpp jáne Brýno Retaıo qatar dodaǵa túsken jaǵdaıda Melanshon 16%, Fılıpp 14%, al Glıýksman 10% daýys jınaýy yqtımal.
Jeksenbide Shatonef-sıýr-Izerde jaqtastary aldynda sóılegen Melanshon prezıdenttik ambıtsııasyn taǵy ańǵartty.
– Jeńiske jetýge bolady, – dedi ol.
Sózinde saıasatker ekologııa men ekonomıka máselelerine basymdyq berdi. Keıingi aptap ystyq, orman órtteri men qurǵaqshylyqtan keıin ol Frantsııada «ekologııalyq memleket» qurý ıdeıasyn kóterdi.
– Klımattyń ózgerýi adamzat órkenıeti tarıhynda múlde jańa dáýirdi bastap otyr, – dedi Melanshon.
Ol sondaı-aq Emmanıýel Makronnyń on jyldyq bıligin qatań synǵa alyp, onyń qyzmetten ketýin «kópshilik azattyqtaı kútip otyrǵanyn» málimdedi.
Osy ýaqytta Frantsııanyń solshyl saıası kúshteri arasynda da báseke kúsheıip keledi. Rafael Glıýksman prezıdent saılaýyna qatysatynyn resmı jarııalady. Ol «Baǵynbaıtyn Frantsııadan» bólek, eýropashyl sotsıal-demokratııalyq solshyl kúsh qalyptastyrýdy kózdeıdi. Saýalnamada ony shamamen 10% saılaýshy qoldaǵan.
Alaıda Melanshon birinshi týrda aıtarlyqtaı ilgerilegenimen, ekinshi týrdaǵy jaǵdaı ázirge onyń paıdasyna emes. Saýalnama boıynsha, Marın Le Penmen tikeleı básekede Le Pen 68%, al Melanshon 32% daýys jınaýy múmkin.
Melanshon solshyl kandıdattardyń kóptigi daýys bólshektenýine ákeledi degen pikirmen kelispeıdi.
– Kandıdattardyń sany emes, saılaýshylardyń sany mańyzdy, – dedi ol.
Aıta keteıik, Frantsııadaǵy prezıdent saılaýynyń birinshi týry 2027 jylǵy 18 sáýirge josparlanǵan.
