Melanııa: AQSh-tyń birinshi hanymy týraly fılmge synshylar ne deıdi

ASTANA. KAZINFORM – AQSh-tyń birinshi hanymy Melanııa Tramp týraly «Melanııa» atty derekti fılm ótken aptanyń sońynda álemdik prokatqa shyqqannan keıin kórermender tarapynan kóptegen teris pikir men kınosynshylardyń ótkir synyna ushyrady, dep jazady VVS.

Soǵan qaramastan, Box Office Mojo jobasynyń deregine sáıkes, 30 qańtar men 1 aqpan aralyǵyndaǵy demalys kúnderi fılm AQSh prokatynda kassalyq tabys boıynsha úshinshi orynǵa shyqqan.

Box Office Mojo dúısenbi kúni «Melanııa» fılmi alǵashqy senbi-jeksenbide 7 mıllıon dollardan astam tabys tapqanyn habarlady. Al synshylar prokattyń alǵashqy úsh kúninde kartına 5 mıllıon dollarǵa da jetpeıdi dep boljaǵan edi.

Fılmde 2025 jyldyń qańtarynda kúıeýi Donald Tramptyń ınaýgýratsııasyna deıingi kezeńdegi Melanııa Tramptyń ómirinen alynǵan 20 kún sýretteledi.

Derekti týyndyda Melanııa Tramptyń saltanatty rásimge daıyndyq barysyndaǵy jeke kezdesýleri, otbasy múshelerimen jáne jaqyn adamdarymen birge túsken azdaǵan kórinister kórsetilgen.

Kóptegen kınosynshylar fılm prokatqa shyqpaı turyp-aq oǵan kúmánmen qaraǵan. Al alǵashqy kórsetilimderden keıin joıqyn retsenzııalar jarııalandy.

The Guardian gazetiniń sholýshysy Ksan Brýks bul týyndyny «birde-bir oń qasıeti joq sırek fılm» dep atady.

– Men tipti muny derekti fılm deýge bolatynyna senimdi emespin. Bul, bálkim, óte muqııat jasalǵan taksıdermııa týyndysy shyǵar: asa qymbat, qol tıgizseń muzdaı seziledi jáne ashkóz patshany razy etýi tıis ortaǵasyrlyq alym retinde usynylǵan, – dep jazdy synshy.

Al Vanity Fair jýrnaly rejısser Brett Ratner túsirgen bul kartınany jalǵan derekti fılm dep atady.

Aıta keteıik, buǵan deıin AQSh-tyń birinshi hanymy týraly fılm jaryqqa shyǵatyny habarlanǵan bolatyn.