Meldonııdi oılap tapqan Ivars Kalvınsh shettetilgen sportshylarǵa raqymshylyq jasalady dep boljady
ASTANA. QazAqparat - Meldonııdi oılap tapqan akademık Ivars Kalvınsh preparatty paıdalanǵan sportshylardyń kóbi aqtalatynyna senim bildirdi. Kalvınshtiń sózin «Sport-Ekspress» keltirdi, dep habarlady Lenta.ru.
«Dúnıejúzilik dopıngke qarsy agenttik (WADA) meldonııdiń adam aǵzasynyń erekshelikterine saı bireýiniń boıynan tez arada, ekinshisiniń boıynan uzaq ýaqyttan keıin ǵana shyǵatynyna baılanysty onyń qansha ýaqytta aǵzadan joǵalatynyn naqty aıta almaıtynyn moıyndaýǵa májbúr bolady dep oılaımyn. Sol sebepti 1 qańtardan keıin ony paıdalanǵan joqpen dep otyrǵan sportshylar aqtalýy tıis. Eger bulaı jasamasa, Olımpıadadan keıin olarǵa (WADA) qarsy sportshylar sotqa shaǵymdana bastaıtyn bolady. Sol kezde olar amalsyz raıynan qaıtady», - dedi Kalvınsh.
18 sáýirde Kalvınsh meldonııdiń dopıng emes ekenin málimdegen edi. Sondaı-aq ol WADA tyıym salǵan zattar tiziminen bul preparatty alý úshin qolynan kelgenin jasaıtynyn aıtqan.
13 sáýirde WADA 2016 jyldyń 1 naýryzyna deıin tapsyrylǵan sportshylardyń dopıng-synamasynda 1 mıkrogramǵa jetpeıtin kólemde meldonııdiń bolýyna ruqsat etiletinin habarlady.
