Mektepti jaqynda aıaqtaǵan: Aýǵanstannyń 4 azamaty Qazaqstanǵa zańsyz kirgen
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl turǵyny páter bıýrosy arqyly óz páterin jalǵa berip kelgen. Ol baspanasynyń jaı-kúıin teksermek bolady. Páterge kelgende esikti til bilmeıtin basqa ulttyń jigiti ashqan. Sondaı-aq onda taǵy úsh jigittiń turyp jatqanyn anyqtaǵan. Kúdiktengen er adam birden polıtsııaǵa júginedi.
Kóshi-qon polıtseıleri tekserý barysynda jigitterdiń Aýǵanstan Islam Respýblıkasynan ekenin anyqtady. Olardyń Qazaqstanda júrýge esh ruqsat qujattary bolmaı shyqqan. Polıtseıler tekseris kezinde sheteldikterdiń QR memlekettik shekarasyn Ózbekstan jaqtan belgilenbegen jerden zańsyz kesip ótkenin anyqtady.
Kóshi-qon qyzmetiniń qyzmetkerleri jınalǵan materıaldardy Petropavl qalalyq polıtsııa basqarmasynyń anyqtaý bólimine tapsyrdy.
Atalǵan fakti «Qazaqstan Respýblıkasynyń Memlekettik shekarasyn qasaqana zańsyz kesip ótý» baby boıynsha Sotqa deıingi tergep-tekserýlerdiń biryńǵaı tizilimine engizildi.
«Jigitter ne qazaq, ne orys tilin bilmeıdi, biz aýdarmashy arqyly tildestik. Aıtýlarynsha, olar mektepti jýyrda aıaqtaǵan. Óz elderinde bolashaqtarynyń joqtyǵyn oılaǵan jastar Batys Eýropaǵa jetip, bosqyndar mártebesin alýdy kózdegen. Qazirgi ýaqytta sheteldikterdiń QR aýmaǵynda zańsyz bolýlarynyń mán-jaıy anyqtalyp jatyr», - deıdi Petropavl qalasy PB AB bastyǵy Dáýren Nyǵmetov.