Mektepti tonaǵan oqýshylar ustaldy - aptalyq brıfıng
ASTANA. Sáýirdiń 21-i. QazAqparat /Arman Asqarov/ - Polıtsııa qyzmetkerleri Qostanaı qalasyndaǵy mektepterdiń birinde oryn alǵan qaraqshylyq shabýylǵa qatysqan kúdiktilerdi ustady.
Bul týraly búgingi baspasóz máslıhatynda QR Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Naýryz aıynyń basynda oryn alǵan osy oqıǵa kezinde belgisiz bireýler mektep kúzetshisin soqqyǵa jyǵyp, ınformatıka kabınetinen jalpy quny 1 mln. 600 myń teńgege baǵalanǵan 16 noýtbýkti urlap áketken. Jedel-izdestirý is-sharalarynyń nátıjesinde Krımınaldyq polıtsııa qyzmetkerleri qaraqshylyq shabýylǵa qatysqandardy ustady. Olar osy mekteptiń túlegi - 18 jastaǵy qylmysty uıymdastyrýshy jáne eki joǵary synyp oqýshylary bolyp shyqty.
